Struktur Artikel

PANGAJHÂRÂN 1
Tèma : Kabhuḍhâjân
GHÂNCARAN
Lalampa'an 2

Indikator
3.1.2 Menjelaskan struktur artikel
Gambar : Artikel


Sosonan Ghâncaran (Struktur Artikel)

Sosonan ghâncaran umumma èngghi ka'ḍinto:

  1. Bhul-ombhul (judul)
  2. Alinèa pamokka'
    Alinèa pamokka' aropa'aghi alinèa sè kabidhân è ḍâlem ghâncaran kaangghuy ngaterraghi nojjhu ḍâ’ alinèa èssè.
  3. Alinèa sè ajhârbâ'âghi (èssè)
    Alinèa èssè aropa'aghi alinèa sè palèng parlo sè ajhârbâ'âghi èssè ponapa sè ampon dhâddi tèma jhughân bhul-ombhul.
  4. Alinèa panotop
    Alinèa panotop aèssè pongkasan pangghâliyân (kesimpulan) jhughân bisa aèssè pangarep-pangarep ḍâ’ para maos (pembaca).
$ads={1}
Mènangka conto, ngèrèng kaghâli areng-sareng sosonan/ struktur ghâncaran sè abhul-ombhul Abhenḍem Tamonè bân Rosèyana
Bhul-ombhul (judul) : Abhenḍem Tamonè bân Rosèyana
Alinèa pamokka' : Sadhâjâ orèng ...... kantos ...... tor èkalampa’aghiyâ
Alinèa sè ajhârbâ'âghi (èssè) : Rosèya èpon akadhi ka’ḍinto ...... kantos ...... ampon èsaḍiyâi nyama
Alinèa panotop : Saka’ḍinto rosèya èpon ...... kantos ...... mabhunga pasèra’a bisaos
Sosonan (struktur) ghâncaran èpanṭa polè dhâddhi 3 macem, è antarana:
  1. Sosonan (struktur) paragraf

    È sabbhân-sabbhân paragraf biyâsaèpon aèssè poko' pèkkèran (pokok pikiran) sareng okara sè ajhârbhâ'âghi (kalimat penjelas). Dhinèng poko' pèkkèran ka'ḍinto bisa bâḍâ è mamolanna paragraf, bisa jughân bâḍâ è pongkasanna / ahèr paragraf. Manabi bâḍâ è mamolanna paragraf ènyamaè paragraf dèduktif, dhinèng poko' pèkkèran sè bâḍâ è pongkasanna/ ahèr paragraf èngghi ka’ḍinto ènyamaè paragraf induktif. Conto neng paragraf 1 ghâncaran è yattas aèssè poko' pèkkèran artè'èpon tamonè, kalabân okaraèpon: Tamonè èngghi ka’ḍinto aropa ḍârâ bungkol sè kalowar saamponna èbhu abhâbhârrâghi bhâbhâji'. Dhinèng okara sè ajhârna'aghi (kalimat penjelas) èngghi ka’ḍinto okara saterrossèpon.

  2. Sosonan oca' (struktur kata)

    Oca' neng bhâsa Madhurâ ka’ḍinto bâḍâ sè èsambhât oca' asal / oca' ḍhâsar, bâḍâ jughân sè èsambhât oca' obâ'ân. Oca' ḍhâsar èngghi ka’ḍinto oca' sè ghi' ta’ aobâ ḍâri asalla amarghâ ta' kèngèng èmbuwân pa-ponapa. Contona: kalambhi, buku, èntar, noro'. Dhinèng sè èmaksod oca' obâ'ân èngghi ka’ḍinto oca' sè ampon aobâ ḍâri asalla. Aobâna bâḍâ sè kèngèng èmbuwân, bâḍâ sè èrangkep, bâḍâ jhughân sè dhâddhi oca' camporan (kata majemuk). Kaangghuy langkong jhârna'èpon bâḍhi èjhârbâ'âghi è bâbâ ka’ḍinto:

    1. Èmbuwân
      Èmbuwân bâḍâ 3 macem, èngghi ka’ḍinto:

      Ter-ater (awalan) è, a, ta, ma, ka, sa, pa, koma, kamè, kapè, pè.

      Conto:
      è + sambhât = èsambhât
      a + ghânḍhu' = aghânḍhu'
      ta + tèḍung = tatèḍung
      ma + teppa' = mateppa'
      ka + bâjâr = kabâjâr
      sa + lambâr = salambâr
      pa + bhersè = pabhersè
      koma + lancang = komalancang
      kamè + poron = kamèporon
      kapè + otangen = kapèotangen
      pè + todhu = pètodhu

      Panotèng (akhiran) è, a, an, en, na, ana, aghi

      Conto:
      loppa + è = loppaè
      bisa + a = bisa’a
      tolès + an = tolèsan
      bhusen + en = busennen
      bhâji' + na = bhâji'na
      noro' + ana = noro'ana
      kala' + aghi = kala'aghi

      Sessellan (sisipan) ar, al, om/um, en/èn, in

      Conto:
      ghibbhung + ar = ghâribbhung
      ghimpo' + al = ghâlimpo'
      sekkar + om = somekkar
      ghântong + um = ghumantong
      parèng + èn = pènarèng
      bhâreng + in = bhinareng

      Oca' rangkep
      Oca' rangkep èngghi ka’ḍinto oca' sè èserrat (ètolès) otabâ èmaos (èbâca) ḍukalè. Dhinèng oca' rangkep bâḍâ 2 macem:

      Oca' rangkep aḍâ'
      Oca' rangkep aḍâ’ èngghi ka’ḍinto oca' rangkep sè keccap aḍâ'na oca' asalla èserrat otabâ èḍhâbuwâghi / èkoca'aghi ḍukalè.
      Oca' rangkep aḍâ’ èpanṭa polè dhâddhi 2 macem:
      Oca' rangkep aḍâ’ pagghun sowara
      Contona:
      lalakè'
      nonolès
      sasamar
      Oca' rangkep aḍâ’ asalèn (aobâ) sowara
      Contona:
      tatello'
      lalèma'
      tatèngghun

      Oca' rangkep buḍi
      Oca' rangkep buḍi èngghi ka’ḍinto oca' rangkep sè keccap buḍina oca' asalla èserrat otabâ èḍhabuwâghi / èkoca'aghi ḍukalè.
      Oca' rangkep buḍi èpanṭa polè dhâddhi ḍuwâ' macem:
      Oca' rangkep buḍi pagghun sowara
      Contona:
      rèng-orèng
      ko-bengko
      ḍâ’-aḍâ’
      Oca' rangkep buḍi asalèn (aobâ) sowara
      Contona:
      car-kacèr
      yak-rèyok
      jân-anjin

      Oca' camporan (kata majemuk)
      Oca' camporan èngghi ka’ḍinto ḍuwâ' oca' sè èpasèttong kantos gaḍhuwân / anḍi’ sèttong artè.
      Oca' camporan bâḍâ 4 macem, èngghi ka’ḍinto:
      Oca' camporan sè ca'-oca'na ghâḍhuwân artè samè (paḍâ)
      Contona:
      anḍhâp asor
      petteng calèmot
      sala lopot
      tèndhâk tandhuk
      Oca' camporan sè ca'-oca'na ghâḍhuwân artè tabhâlik
      Contona:
      lakè' binè'
      sèyang malem
      paè' manès
      tellap tellè
      Oca' sè sèttong dhâddhi katerranganna oca' sè laèn
      Contona:
      toko obhât
      roma sakè'
      talèbât rajâ
      motor ekkol
      Ca'-oca'na ghâḍhuwân artè kèyas
      Contona:
      rajâ atè
      rajâ cèṭak
      amaèn mata
      aotang rassa
  3. Sosonan okara (struktur kalimat)
    Okara lako (kalimat aktif)
    Okara lako èngghi ka’ḍinto okara jhejjherrâ ngalakonè sèttong kalakowan.
    Contona:
    Sadhâjâ orèng ampon ngaghâli ponapa sè èmaksod sareng tamonè
    Katerrangan:
    J = jhejher (subjek)
    C = carètana (predikat)
    L = lèsan (objek)
    Okara nyanḍhâng (kalimat pasif)
    Okara nyanḍhâng èngghi ka’ḍinto okara sè jhejjherrâ ètèbhânè sèttong kalakowan.
    Contona:
    Tamonèna ampon èbhenḍem sareng rama

    Okara samporna
    Okara samporna èngghi ka’ḍinto okara sè jhejjer sareng carètana padâ bâḍâ.
    Contona:
    Èbu asarèn
    Imam ngajhi
    Okara ta' samporna
    Okara ta' samporna èngghi ka’ḍinto okara sè jhejjher otabâ carètana taḍâ’.
    Contona:
    Nolès
    Toni

Apa Komentarmu?

Komentar yang dirasa merugikan situs ini akan dihapus. Terima kasih telah berkunjung

Lebih baru Lebih lama