SELAMATAN 7 BULANAN

Selamatan tujuh bulanan atau biasa disebut pèlèt kanḍung atau oro’ kanḍung bagi masyarakt Madura biasanya dilaksanakan pada tanggal 14 atau 15 bulan Hijriyah. Mereka percaya bahwa pada tanggal tersebut terkandung makna yang mendalam yakni kesempurnaan baik itu ketika bayi tersebut dalam proses dilahirkan sampai pada rupa dan tingkah lakunya juga sempurna, menjadi penyejuk mata bagi kedua orang tuanya.

Pèlèt kanḍung aropa'aghi salameddhân kanḍungan sè èlampa'aghi è nalèka kanḍungan aomor pèttong bulân. biyâsaèpon èlampa'aghi è nalèka tangghâl 14, amarghâ tangghâl 14 aropa bulân pornama, sè tera', tor bhâḍhi langkong tera' èngghi ka'ḍinto tangghâl 15. Kalabân maksod nyopprè bhâji' sè bâḍâ è kanḍungan saamporna bhâbhâr ghâḍhuwân bâtek sè samporna akanṭa bulân pornama jhughân lalakonnèpon/ tèngka lakona tor sadhâjâna langkong saè akadhi ḍâri tangghâl 14 ka tangghâl 15.

Upacara adhât Pèlèt Kanḍung/ Pèlèt Betteng ka'ḍinto ampon dhâddhi kaparcajâ'ân maghârsarè Madhurâ sè ghâḍhuwân maksod tor pangarep nyopprè bhâji' ka'ḍinto bhâbhâr kalabân salamet tor dhâddhi na'-kana' sè solèh otabâèpon solèha. Mèlana cè' parlona panjhennengngan ngaghâli parkara Pèlèt Kanḍung/ Pèlèt Betteng ka'ḍinto, amarghâ ka'ḍinto aropa'aghi dhâdhingghâlân para seppo sè kodhu èpèyara tor èpalanggheng nyopprè ta' kantos èlang sèrna. Dhinèng lalampa’annèpon akadhi panèka :

Sè kabidhân ḍâlem upacara adhât pèlèt kanḍung èngghi ka'ḍinto ḍhukon bhâji' mècet/ ngoro' (mèlèt) otabâ ajhungjhung paḍhâ'ârân èbhu sè bhubhut kalabân aghuna'aghi mènnya' kalettèk/ mènnya' nyèyor. Maksod ḍâri mècet ka'ḍinto kaangghuy ngator kennengnganna bhâbhâji' ḍâlem kanḍungan nyopprè bhâbhâr kalabân ghâmpang jhughân kaangghuy kasèhadhân èbhuna bhâbhâji' ghellâ’. Parkara mècet ka'ḍinto èlampa'aghi ḍâlem pangkèng/ kamar.

Sè kapèng ḍuwâ' èterrossaghi sareng pamaosan AI-Qur'an sareng para onjhângan lakè'an sè èseppowè sareng kyaè. Biyâsaèpon sè èmaos nalèka kasebbhut sorat Yasin, sorat Yusuf tor Sorat Maryam. Maos sorat Yasin ghâḍhuwân pangarep nyopprè bhâbhâji' sareng èbhuwèpon salamet. Dhinèng pamaosan sorat Yusuf ka’ḍinto nyopprè bhâbhâji' saamponna bhâbhâr manabi lalakè' gânṭeng, manabi bâbinè' raddhin (bhâghus) akanṭa nabi Yusuf, sorat Maryam nyopprè bhâbhâji' ghâḍhuwân kasoccèyan akadhi Siti Maryam tor bilâ ḍâpa' ka bâjâna bhâbhâr ghâmpang akadhi Siti Maryam abhâbhâr Nabi Isa alaihissalam. Saamponna panèka èterrossaghi maos dhuwâ walimatul hamli.

$ads={1}

Baca juga Doa Walimatul Hamli di sini

Saamponna lastarè pamaosan Al-Qur'an, sè bhubhut sareng rakaèpon èyèrèng sareng ḍhukon bhâbhâji' ḍâ’ tanèyan kaangghuy esèram (èpandi'i). Èpalongghu è korsè tor èsaḍiyâ'âghi aèng sè èpobuwi cem-macemma kembhâng, kong-langkong kembhâng-kembhâng Madhurâ akadhi malaṭè, ghâḍḍhing konèng, ghâdḍhing potè, kananga, bhâbur sareng salaènnèpon, jhughân bâḍâ panḍân. Saamponna ka'ḍinto ḍhukon bhâbhâji' nyabâ' pèssè kernèngan ḍâ’ pennay sè ampon aèssè aèng kembhâng kasebbhut tor ngabidhi nyèram (manḍi’i) kalabân aghuna'aghi canṭèng bhâṭok sè ghi' bâḍâ nyèyorra sè adhinangan ranca'na kaju bâringèn. Saamponna ḍhukon lastarè nyèram, sadhâjâ rèng seppo, tarètan/ bhâlâ nyabâ' obâng sè keccap aḍâ’na amonyè sa, ompamaèpon saratos, saèbu èterrosaghi nyèram kalabân ghilirân. Ḍâlem nyèram kasebbhut, sè nyèram sambi maos solawat. Èbhu sè bhubhut sareng rakaèpon nalèka èseram sambi ngastanè nyèyor ghâḍḍhing sè lonyo (bhâghus) se èsabâ' è rèbâ'ânnèpon. Nyèyor ghâḍḍhing kasebbhut èserrat aksara Carakan ngabidhi ḍâri ha na ca ra ka kantos pa ḍâ jâ yâ nya

ꦲ ꦤ ꦕ ꦫ ꦏ ꦢ ꦠ ꦱ ꦮ ꦭ ꦥ ꦣ ꦗ ꦪ ꦚ

Sè ghâḍhuwân maksod bâḍâ konkonan ḍâḍuwâ', kèngèng amanat, moghâ paḍâ jhâjâ. Salaèn aksara Carakan jhughân èserrat aksara Arab ḍâri a kanto yâ

ا ب ت س ج ح خ د ذ ر ز س ش ص ض ط ظ ع غ ف ق ك ل م ن و ه لا ء ي

Sè ghâḍhuwân maksod sopajâ kana’ sè ghi’ bâḍâ èkanḍungan ka’ḍinto manabi ampon bhâbhâr pènter ngajhi.

Nyèyor ghâḍḍhing kasebbhut ta' èbuwâng, nangèng Èsabâ' è bâbâna pasarènan (katèḍungan). Saamponna ka'ḍinto, sè bhuhhut maghâgghâr tellor sè bâḍâ è rèbâ'ânnèpon, Tellor èpateḍḍhâs kalabân panyo'on ka ghustè Allah nyopprè bhâji' kasebbhut bhâbhâr (lahir) kalabân ta' malarat / ghâmpang akadhi teddhâssâ tellor.

Pongkasanna rakana pas ngerra' rambây (sombhuna kompor) sè ètalèyaghi ka rajina sè arapo labun kalabân laddhing sè tajhem jhughân èkerra' sakalèyan kèra tèghâsâ, Parkara ka'ḍinto ghâḍhuwân maksod nyopprè panyo'on rakana tajhernma kadhiyâ laddhing sè èkerra'aghi, panyo'onna èkabbhuli sareng Allah.

Baca juga UPACARA ADAT SUKU MADURA