Cara Menjadi Pembawa Acara yang Baik dan Benar

PANGAJHÂRÂN 3
Tèma : Kaaghâma'an
Parèntèng Lampa
Lalampa’an 3

Indikator
3.3.7 Menjelaskan kriteria menjadi parèntèng lampa yang baik.
4.3.1 Membuat kerangka teks parèntèng lampa suatu kegiatan
4.3.2 Menulis teks parèntèrng lampa yang menggunakan oca’ lalongèt

Kali kita akan belajar bagaimana cara menjadi parèntèng lampa yang baik dan bagus, membuat kerangka dan menulis parèntèng lampa dengan benar

Gambar : Pembawa Acara

Katantowan Dhâddhi Parèntèng Lampa sè Saè (Kriteria Menjadi Pembawa Acara yang Baik)

Akadhi sè ampon èjhârbâ’âghi neng pangajhârân sabellunna (baca Struktur Teks Pembawa Acara), jhâ’ parèntèng lampa ka’ḍinto bisa èsambhât sala sèttong orèng sè nantowaghi lancar ta’ lancarra, saè ta’ saèna sèttong lampa. Parentèng lampa dhâddhi bâgiyân sè èyoladhi para rabu ḍâlem sèttong lampa. Saè-saèyana otabâ saghus-bhâghussâna lampa sè èrèntèng, nangèng manabi parèntèng lampana ta’ ghâḍhuwân otabâ korang ghâḍhuwân kalongèdhân tor korang sanat, tantowèpon pas ta’ èpangghi karowanna, bisa salbut asalsalan lampa kasebbhut, ta’ sorop kalabân pangarep. Mèlaèpon, kaangghuy dhâddhi parèntèng lampa sè saè ta’ cokop kalabân abhânḍhâ sowara sè saè saos, nangèng parlo latèyan bâtek (mental), bhâdhân (fisik) sè cokop, jhughân ètonjhâng kalabân pètodhu (referensi) akadhi pangaonèngan tata cara / atoran, pangaonèngan parkara pètodhu parèntèng lampa, pangaonèngan parkara tatakrama, panganèngan parkara bhâsa tor laènnèpon. Anḍhâsar pangaonèngan kasebbhut, parèntèng lampa èyarep bisa ngalakonè kalabân saè.

Salaèn ḍâri sè ampon èjhârbâ’âghi è attas, bâḍâ pan-saponapan parkara sè kodhu èka’anḍi’ parèntèng lampa, è yantaraèpon:

1. ghâḍhuwân bâtek sè saè tor andhâp asor,
2. saè pangghâliyânnèpon, masenneng ka pangoladhân, jhughân ta’ anggâ’,
3. èyormadhi, atoro’ atoran tor tangghung jâwâb,
4. bisa ngobâsanè kabâḍâ’ân,
5. manyèttong pangghâliyân ḍâ’ pa-ponapa sè èlampa’aghi,
6. ngobâsanè ongrodhânna/ anṭat lampa,
7. totor bhâsana saè, jhughân ongghâ toronna sowara, vokal, bls.
8. ngaghem busana sè saè, èyakorraghi sareng lampa,
9. Parcajâ ḍâ’ abâ’na dhibi'.

$ads={1}

Kawâjibhânnèpon Parèntèng Lampa (Tugas Pembawa Acara)

Sabellunnèpon lampa èkabidhi, parèntèng lampa tanto kodhu arèntèng/ nyoson anṭat lampa otabâ rentèngan lampa. Anṭat lampa kodhu èyakorraghi sareng kaparlowan bâkto kasebbhut, pasèra sè kodhu ngatorè ḍhâḍhâbun/ pyator (sambutan), tor pasera bisaos sè rabu. Saamponna anṭat lampa ampon Iastarè èrèntèng/ èsoson, saterrossèpon parèntèng lampa majhâlân lampa ènalèka lalampan.

Kawâjibhân sè langkong parlo parèntèng lampa èngghi ka’ḍinto:

Mokka’ lampa

Mokka’ lampa èssèèpon èngghi ka’ḍinto ngatorraghi kamoljâ’ân ḍâ’ sè ampon rabu, ngatorraghi mator sakalangkong, ngatorraghi pojhi sokkor ḍâ’ ajunannèpon Allah, nyebbhuttaghi lalampan kasebbhut ponapa, maos rèntèngan lampa sè ampon èrèntèng tor ngabidhi mokka’ lampa.

Nyeppowè lampa

Nyeppowè lampa artèèpon majhâlân lampa ḍâri sè kabidhân kantos pongkasannèpon lampa. Ḍâlem nyeppowè lampa nyopprè para rabu ta’ arassa sompek otabâèpon bhusen, mèlaèpon ca’-oca’ otabâ bhâsa kodhu ghâmpang èkaonèngè otabâèpon èpahamè jhughân bisa mèkat para rabu. Kaangghuy bisa mèkat tor makasambu’ para rabu mèlaèpon jhughân parlo aghuna’aghi bhâsa rarengghân otabâèpon oca’ Ialonget.

Notop lampa

È ḍâlem notop lampa tantowèpon kodhu nyo’on sapora / mènta ma’ap ḍâ’ para rabu, marghâ tako’ ḍâlem nyeppowè lampa bâḍâ ca’-oca’ otabâ sala tèngka sè korang sondhuk mongghu pangghâliyânnèpon para rabu. Saamponna ka’ḍinto èterrossaghi notop lampa tor èpongkasè kalabân salam.

Caraèpon Nyerrat Bâca’an Parenteng Lampa (Teknik Menulis Teks Pembawa Acara)

Caraèpon nyerrat bâca’an parèntèng lampa èstowèpon ta’ malarat, manabi ampon ngaghâli/ onèng ḍâ’ anṭat/ sosonan bâca’an kangghuy rèntèngan lampa, akadhi salam pamokka’, pojhi sokkor, èssè jhughân okara pongkasan akadhi sè ampon èjhârna’aghi neng pangajhârân sabellunnèpon. Namong sè parlo èkaghâli jhughân èkaèmodhi, cara aghuna’aghi bhâsa ḍâlem bâca’an rentèngan lampa tanto kodhu saè / bhâghus, ta’ kalèro angghuyânnèpon ḍâlem aghuna’aghi onḍhâgghâ bhâsa nyopprè ta’ kaoladhân cangkolang otabâèpon ta’ anḍhâp asor. Tor jhughân nyopprè orèng sè mèrengngaghi arassa kasokan/ senneng parlo aghuna’aghi / ètoro’è bhâsa rarengghân/ oca’ Ialongèt akadhi okara kakanṭèn, bhângsalan, saloka sareng salènnèpon.

Caraèpon Dhâddhi Parenteng Lampa (Teknik Menjadi Pembawa Acara)

Caraèpon dhâddhi parèntèng lampa sè saè engghi ka’ḍinto:

1. Bhâsa sè èyangghuy parèntèng lampa èngghi ka’ḍinto bhâsa sè saè, cocok sareng onḍhâgghâ bhâsa jhughân ghâmpang èkaonèngè/ èpahamè sareng para rabu.
2. Ongghâ toronna sowara sè èyatorraghi kodhu akor kalabân kabâḍâ’ân bâkto tormator. Parèntèng lampa kodhu bisa ngobâ sowara sè èyakorraghi kalabân lampa. Nyopprè ongghâ toronna sowara sè saè, talèktèghi tanḍhâ bâca ḍâlem okara.
3. Parèntèng lampa kodhu ngator nyabâ (pernafasan) kalabân saè, nyopprè ḍâlem maos okara ta’ ghâ’-pegghâ’ sè dhâddhi okara ta’ jhârna’ kapèrengnganna.
4. Ḍâlem maos ca’-oca’ (vokal) kodhu jhârna’.

Èyatorè bukka' polè contona parèntèng lampa panèka!