STRUKTUR TEKS PEMBAWA ACARA

PANGAJHÂRÂN 3
Tèma : Kaaghâma’an
Parèntèng Lampa
Lalampa’an 1

Indikator
3.3.1 Mengindentifikasi struktur teks parèntèng lampa
3.3.2 Menganalisis struktur teks parèntèng lampa

Pada pemebalajaran kali ini kita akan membahas tentang struktur teks parèntèng lampa (pembawa acara). Parèntèng lampa biasanya digunakan ketika ada acara seperti perkawinan, walimahan, maulidan, pengajian dan lain sebagainya.

Anṭat/ Sosonan Bâca’an Kaangghuy Rèntèngan Lampa (Struktur Teks Pembawa Acara)

Panjhennengngan tantowèpon onèng otabâ segghut rabu otabâ ngoladhi lampa. Akadhi lampa Jhâng-onjhângan, Molang Arè, Ngaèmodhi Bhâbhârrèpon Kanjeng Nabi (Maulidun Nabi), Temmo Jhudhu/ Kakabinan (Akad Nikah), sareng salaènnèpon. Ḍâlem lampa-lampa kasebbhut tanto marlowaghi parèntèng lampa kaangghuy nyeppowè (memimpin) lampa kasebbhut.

Parèntèng lampa èngghi ka’ḍinto orèng sè majhâlân otabâ ngator jhâlânna lampa ḍâri kabidhân kantos pongkasannèpon lampa. Mèlaèpon parèntèng lampa ka’ḍinto bisa èsambhât sala sèttong orèng sè nantowaghi saè ta’ saèna, Iancar ta’ lancarra sèttong lampa. Mèla ḍâri ka’ḍinto, parentèng lampa langkong ḍhimèn kodhu onèng ḍâ’ anṭat (sosonan) bâca’an kanggghuy rentèngan lampa.

Dhinèng anṭat bâca’an kaangghuy rèntèngan lampa èngghi ka’ḍinto:

$ads={1}

Salam pamokka’

Salam pamokka’ salaèn aèssè salam “assalamu alaikum warahmatullahi wabarakatuh” jhughân aèssè okara pamokka’. Okara pamokka’ èssè’èpon ngatorraghi kamoljâ’ân ḍâ’ sadhâjâ sè ampon rabu ḍâlem lampa kasebbhut, èkabidhi ḍâri sè langkong tèngghi dhârâjhâddhâ kantos sè palèng mabâ dhârâjhâddhâ.

Pojhi sokkor

Okara pojhi sokkor cè’ parlona èyatorraghi menangka sala sèttong pangabhâktè bhâdhân kaulâ sareng panjhennengngan ḍâ’ Allah menangka kabulâèpon. Mala langkong saè ètambâi ngatorraghi solawat sareng salam amarghâ bhâdhân kaulâ sareng panjhennengngan ommattèpon Nabi Muhammad ﷺ.

Èssè

Èssè ka’ḍinto aèssè rentèngannèpon lampa ḍâri sè kabidhân kantos sè pongkasan.

Okara pongkasan

Okara pongkasan ka’ḍinto parèntèng lampa kodhu ngatorraghi mator sakalangkong ḍâ’ sadhâjâ kasala’an, kacangkolangan, kakalèrowan sareng samacemmèpon tor èyahèrè kalabân salam pongkasan (salam panotop).

èyatorè maos patalètè conto bâca’an rèntèngan lampa bâbâ ka’ḍinto!

Assalamu alaikum warahmatullahi wabarakatuh.

Sè bhâdhân kaulâ amoljâ’âghi para alèm tor olama’, para ustadz, para ghuru ngajhi, para seppo, para parnyaè, para anom para rabu sè samè alongghu jhimet parjughâ sè bhâdhân kaulâ amoljâ’âghi.

Kabidhân ator, ngèrèng areng-sareng ngatorraghi okara pojhi sokkor alhamdulillah ḍâ’ ajunannèpon Allah sè amorbhâ jhâghât, amarghâ bhâdhân kaulâ sareng para ajunan salagghi’ kaparèng bherkat omor, sè abhunggher cengngar bhinar paḍâ samarambâ, kantos kaèdhi kaangghuy aghi-pangghi è engghun ka’ḍinto ḍâlem lampa “Molang Arè Pottra sè sarèyang Bâpa’ Moh. Syamsul sareng Èbhu Aminah” lerres arè samangkèn Satto, 1 Mèi 2021 neng dhâlemmèpon Bâpa’ Moh. Syamsul Dhisa Sombherkolak Kacamadhân Panarokan, Situbândâ. Solawat jhughân salam malar moghâ teptep kaator ḍâ’ gustè Kanjing Nabi Muhammad ﷺ.

Para rabu sè samè alongghu jhimet parjughâ.

Bhâdhân kaulâ sè ghi’ ta’ onèng lèbât è bâbâna bâringèn, sè ghi’ ta’ nyerrep bujâ accem, kèngèng bhubbhuwân pakon moljâ mènangka parèntèng lampa sa’at samangkèn ka’ḍinto.

Para rabu sè samè alongghu jhimet parjughâ.

Bhâdhân kaulâ samangkèn bhâḍhi maca anṭat lampa sè insya Allah bhâḍhi kalampan èsa’at samangkèn.

1. Lampa sè kapèng 1 pamokka’.
2. Lampa sè kapèng 2 ḍhâḍhâbun (sambhudhân).
3. Lampa sè kapèng 3 pamaosan solawat Nabi sè bhâḍhi èyèrèngè sareng hadrah.
4. Lampa sè kapèng 4 bâbulângan beccè’ (mau’idatul hasanah) sè bhâḍhi èyatorraghi sareng sè moljâ Kyaè Imam Mawardi sè rabuwèpon ḍâri Sokarajjhâ.
5. Lampa sè pongkasan panotop otabâ du’a sè bhâḍhi è seppowè sareng sè moljâ Ustadz H. Moh. Nur Rasyidi, S.Pd,I.

Para rabu sè samè alongghu jhimet parjhughâ.

Ngèrèng kabidhi lampa sè kapèng 1, èngghi ka’ḍinto pamokka’. Nyopprè lampa ka’ḍinto kalampan kalabân saè, kèngèng ridaèpon Allah, ngèrèng bukka’ kalabân pamaosan Fatihah. Alfatihah,...

(pamaosan Fatihah)

Mator sakalangkong, malar moghâ lampa sa’at samangkèn kalampan kalabân saè jhughân kèngèng ridâèpon Allah Subhanahu wa ta’ala. Amin.

Lampa sè kapèng 2, ḍhâḍhâbun (sambhudhân). ḍâ’ salèrana sè moljâ Bâpa’ Moh. Samsul bâkto kaator.

(ḍhâḍhâbun)

Mator sakalangkong. Lampa sè kapèng 3 pamaosan Solawat Nabi sè bhâḍhi èseppowè sareng salèraèpon sè moljâ Ustad Ghazali Malik. Bhâḍhi èyèrèngè kalabân hadrah, tor ètoro’è jhughân sareng lampa ngeṭṭok obu’na bhâbhâji’. Ḍâ’ salèraèpon sè moljâ ustadz Ghazali Malik bâkto kaator.

(pamaosan solawat)

Mator sakalangkong, malar moghâ sè maos jhughân sè mèyarsa’aghi kèngènga ghânjhârân ḍâri Allah tor kèngènga safa’attèpon Rasulullah ﷺ jhughân kalabân pamaosan solawat ka’ḍinto malar moghâ kacong Moh. Khoirul Anam pottra Bâpa’ Moh. Syamsul sareng Èbhu Aminah sè ampon èsalameddhi è arè samangken kèngènga barokah tor syafa’attèpon kanjing Nabi Muhammad ﷺ. kantos bisa dhâddhi na’-kana’ sè solèh, abhâktè tor mèghunanè ḍâ’ rèng seppo, ghuru, bhângsa tor naghârâ kong-langkong ḍâ’ aghâma. Amin....!

Lampa sè kapèng 4 ḍhâḍhâbun (bâbulângan aghâma) sè bhâḍhi èyatorraghi sareng sè moljâ kyaè H. Imam Mawardi, ḍâ’ ka salèraèpon sè moljâ Kyaè Imam Mawardi bâkto kaator.

(mau’idatul hasanah)

Mator sakalangkong, malar moghâ bhâdhân kaulâ sareng para ajunan bisa monḍhut hèkmah mau’idatul hasanah sè ampon èḍhâbuwâghi sareng sè moljâ kyaè H. Imam Mawardi, kong-langkong bâḍâ’â hèkmah-èpon jhughân mèghunanè ḍâ’ Bâpa’ Moh. Samsul sana’ bhârâjhâ kong-langkong ḍâ’ potraèpon. Amin!

Lampa sè pongkasan èngghi ka’ḍinto panotop. Sè bhâḍhi èpongkasè kalabân pamaosan du’a bhâḍhi èseppowè sareng sè moljâ Ustadz H. Moh. Nur Rasyidi, S.Pd,I. Ḍâ’ sè moljâ Ustadz H. Moh. Nur Rasyidi, S.Pd.I. bâkto ka’ator.

(pamaosan du’a)

Mator sakalangkong. Kalabân pamaosan du’a, ka’ḍinto mènangka tatengnger jhâ’ lampa sa’at samangkèn ampon lastarè.

Bhâdhân kaulâ ngatorraghi mator sakalangkong ḍâ’ sadhâjâ para rabu sè ampon soddhi ngèrèng lampa ḍâri sè kabidhân kantos pongkasannèpon lampa. Sobung sè bisa èparèngngaghi ḍâ’ ka ajunan ḍâri shohibul bait kajhâbhâ’â du’a jâzâkumulla ahsana jâzâ. Bhâdhân kaulâ mènangka parèntèng lampa, bâḍḍhâ kembhâng sadhâjâ kalopodhân, semmènna lorong rajà sadhâjâ katoppalan tor kacangkolangan nyo’on sapora sè sarajâ-rajâèpon.

Wassalamu alaikum warahmatullahi wabarakatuh.

Èyatorè oladhi video Parèntèng Lampa è bâbâ ka'ḍinto: