TENGGELAMNYA KAPAL SELAM NANGGALA

Cerita ini hanyalah gambaran kesedihan hati seorang istri yang ditinggal suaminya. Istri yang sangat mencintai dengan tulus karena Allah. Cerita ini bukan cerita nyata, bukan juga ceritanya salah satu Syuhada' Tenggelamnya Kapal Selam KRI Nanggala 402. Semoga Alah merahmati mereka dan menghadiahkan mereka Surga dengan segala kenikmatannya. Dan semoga keluarga yang ditinggalkan diberikan ketabahan dan kesabaran. Amiin. Mari kita bacakan al-Fatiha kepada mereka.

KAREMMA KAPAL SÈLLEM NAGGHÂLÂ

“Lè’, tolong siyappaghi pè-napè sè èghibâ’â paḍâna sè biyasana rowa. Lagghuna bulâ latèyana,” pènta Ka’ Heru ka engko’ marèna asaor.

“Èngghi, samangkèn saponapa abiddhâ?” tanyana engko’

“Latèyanna arè Rebbhu, para’ sèyang ngocola torpedo, èterrossaghi nèngghâr pèlor perrang. Ghu-laghhu palèng pon ta’ neng è aèng polè. Coma, bânnya’ sè kodhu èsiyappaghi, dhâddhi lagghuna pon kodhu mangkat.”

“Bhâli polè ghi Ka’?”

“Engghi, alè’ sè raddhin. Anapè jhânowa?”

“Ta’ aponapa, nangèng bânnya’ bule sè angghuyânna kakorangan kaèn. Nèserra tang lakè sè lagghi' apowasa nèka. Masṭè kodhu cè’ ajâgâna ka pangolatanna.”

Ka’ emmas kel-bhâjhikel saèngghâ socana mapècèng. Ghellâ’na sè dhâddhi panglèporra atè sajjhegghâ bhuru katemmo.

$ads={1}

“Bulâ kan ta’ amaèn neng ghir sèrèng, nan-maènan bân pakakas perrang è ḍâlem kapal, è ḍâlem saghârâ sè masṭè ta’ kèra bâḍâ bule alanggoy. Palèngan pèra’ duyung. Tapè, sanajjân bâḍâ duyung, pasṭè ta’ saraddhin dhika.”

Ta’ ngartè arapa engko’ ghi’ pagghun toḍus mon Ka’ Emmas Heru aghuḍhâ bân ngoca’ sè nès-manès ka sèngko’.

“Lâ, pèpèna mèra ghânèko, ghântè’ pon para’ sapolo taon alâ-bhâlâ,” ghuḍhâna polè sambi nodhui pèpèna sèngko’ sè arassa anga’.

“Emh, ampon ambu ka’. Ra-kèra, Ka’ Emmas bisa palèman pas molang arè kabinna kita? Ampon para’ sapolo taon, kaulâ bellun tapak èparèngè jhâjhân.” Engko’ ṭa-kanṭa agârungngong sopajâ Ka’ Heru ta’ aghuḍhâ polè. Ongghu engko’ ghi’ ta’ kowat ḍâ’ ka ghuḍâ’anna sè makapèncot atè.

“Ngèstowaghi ḍhâbhu, alè’ sè raddhin,” saotta sambi mabungko’ è yaḍâ’na engko’ jâ’-sajâ’â bâḍâ è yaḍâ’na pottrè rato paḍâna è fèlm-fèlm tivi.

Saarè bhentèng engko’ bân Mas Heru atong-rontong terros wa’-ḍuwâ’ân ètoro’ buntè’ ḍâ’âmma’a bhâi engko’ ajhâlân, kajhâbâ’â ka pakèbân (WC). Kabhenḍerrân ana’na engko’ sè ḍâḍuwâ’ molaè bâ’âri’ ngènep è bengkona kaè bân nyaèna.

Engko’ bân Mas Heru èntar ka minimarket è yaḍâ’na èmbong ngangghuy sapèḍâ motor, mellè bâlânjhâ’ân kaangghuy ngessè’è kulkas bân ghu’-ghângghu’ (camilan). Ka’ Heru mènta engko’ amassa’ tomèssa kangkong bân ajâm kella kècap, massa’an kasennengnganna. Engko’ amassa’ kalabân rassa ghughup karana dhibi’na toju’ è mèjana ḍâpor, ta’ no-ngano apa kajhâbhâna mandheng engko’ malolo.

“Anèko cè’ nyamanna. Kaso’on lè’, salanjhângnga nèko dhika pon dhâddhi binè sè sabbhâr bân samporna ka bulâ.”

“Kaulâ sè kalangkong Ka’ Emmas, karana panjhennengngan ampon kasokan sabbhâr asareng kaulâ. Panjhennengngan panèka raka sè langkong bhâghussâ sadhunnya sè jhât khusus ècèpta mongghu kaulâ,” alemma engko’ kalabân tarongghu.

***

“Bulâ mangkata ghi, Le’. Ngastètè è bengko. Moghâ Allah ajâgâ dhika bân na’-kana’,” pamètanna samarèna asalat sobbhu. Sempet adarus bân nètènè apalanna na’-kana’ kèya sabellunna ta-maranta.

“Panjhennengngan jhughân tè-ngatè, ghi. Moghâ Allah ajâgâ Ka’ Emmas jhughân è ka’ḍimma’a bisaos. Kaulâ ampon nyangowè sambhel kacang bân tèmpè kaangghuy saor sareng bhukana. Manabi bâḍâ bâkto kaangghuy aparèng kabhâr, jhâ’ loppa kabhâri ghi, Ka’ Emmas!”

Mas Heru aoggu’, terros aghellu’ cè’ serretta lajhu nyèyom bun-embunanna engko’ sambi adhuwâ sa’-kasa’. Engko’ la segghut ngater mon la mangkata adines, tapè satèya romasana ghu-ongghu cè’ berrâ’na. È bâjâ motor (mobil) sè ngonè’è la èlang ḍâri pangabâsân, ḍhâk sakala atèna engko’ aromasa caltong.

Pan-bârâmpan kalè Ka’ Heru nèlpon sampè’ Rebbhu para’ sèyang sabellunna maso’ ka kapal sèllem.

“Bulâ pon nyèllemma, Lè’. Dhuwâ’âghi ghi. O èngghi, sambhel kacangnga pon taḍâ’ bâkto abhuka bhâri’ânna. Ca-kanca paḍâ èberri’ kabbhi. Lagghuna asaora napè, ghi?” oca’na neng è tèlpon.

“Aḍhâ’âr ḍhâ’ârânna kapal.” Engko’ sambi aghellâ’ân è antarana katonḍu, sabellunna nyator polè. “Ḍâgghi’ manabi panjhenengngan ampon palèman, kèngèng mènta bhâḍhi èmassa’ana ponapa bisaos.”

Seppè ḍâri bun jhâuwânna, engko’ sampè’ nèngghu apa sambhunganna pegghâ’, tapè enjâ’.

“Ka’ Emmas.... Panjhennengngan ngalamon, èngghi?” tanyana engko’

“Emh... engghi. Bulâ cè’ kerrongnga,” serrona. “Sayang, jâgâ na’-kana’, ghi? Dhika masṭè bisa.”

“Panjhennengngan ma’ aḍhâbu saka’ḍinto?” saotta engko’. “Akadhi sè nyèngla’a ka ka’ḍimma.”

“Ta’ pè-napè, mo-temmo kapèkkèran ghânèko. Empon ghâllu, ghi. Sakejjhâ’ agghi’ èyolok, nèko. Uhibbuki fillah, yâ zaujâtiy.”

Sabellunna sempat males ḍhâbuna, sambhungan telponna pegghâ’.

“Kaulâ jhugân, èsto tarèsna ka panjhennengngan karana Allah, Ka’ Emmas.”

Samarèna telpon jârèya, ta’ tao arapa pèkkèran rèya ta’ tennang, ta’ karowan lajhu lesso sè lalakona pa-apa. Rè-jhâârè, rèngsana atè samporna andhâddhiyâghi tangès. Kapal sèllem arowa èlang kontak.

Engko’ ngala’ wudu’ kalabân areppan sakonè’ matennang kerso’na pèkkèran. Samarèna jârèya, ashalat ḍu raka’at bân èyonjhuk sakabbhinna rèngsana atè ka attas langngè’. Cè’ ngartèna, jhâ’ saongghuna taḍâ’ sè lebbi kobâsa bân kennengngana aparnyo’onan tolong angèng Allah.

Bâkto ajhâlân on-laon. Paḍâ kala statussâ ghi’ èkabhârrâghi èlang, pangarep rèya ghi’ pangghun tèngghi ongkol. Saenjâ’na, mètorot bertana kapal sèllem rowa ngèbâ cokop bânnyal sango (logistik) bân saḍiyâ’ân oksigen ghi’ nyokopè sampè’ 72 jhâm.

Sa arè la lèbât, engko’ abhuka bân asaor èbhârengngè dherressâ aèng mata bân sabânnya’na dhuwâ. Taḍâ’ kabhâr sè bisa matennang pèkkèr.

Arè kapèng ḍuwâ’, kabhârrâ kapalla bâḍâ è kaḍâlemman korang lebbi 850m è saghârâ palèng mabâ. ḍu Ghustè Alla... ta’ bisa maso’ ka pèkkèr tang lakè bân ca-kancana ajhuwâng ambâ’ patè è saghârâ sè ḍâlem sè bisa maremmok bhâdhân karanana ètekket, apa polè bhâdhânna manossa. Ḍân-paḍânna ècèccè’è 100 ghâjhâ sè jâ-rajâ.

Tang atè sajân ancor paḍâ kala bâḍâ berta ètemmona cor-ancorra kapal bân râng-bhârângnga sè èparcajâ bâgiyân ḍâri kapal sèllem sè ètompa’ lakè bân ca-kancana. Tang mata mancerreng ka ghulunganna kaca tivi. Ta’ sala polè, arowa sajâdâ bân waterproof sè èbelli engko’ kaangghuy Ka’ Emmas Heru.

Yâ Allah Ghustè Pangèran... ponapa panèka saatta abdhina kaangghuy alèllanè?

È bâkto engko’ nyèllem ḍâlem tangèsan, èkaèḍing bèlla labâng amonyè. Kasorang lalakè’ ngèbâ bhughellânna kembhâng mabâr (mawar) bân jhâjhânna.

“Bhâ’ lerressa panèka compo’na Ibu Zainatul Widat?” tanyana.

“Èngghi.”

“Ka’ḍinto bâḍâ pakèt kaangghuy panjhennengngan, tolong tanḍhâ labheddhâ ghi.”

“Kaso’on,” oca’na engko’ saellana alabhed bhuktè tarèma ghellâ’.

Samolaè bhuru ollè cara rèya è molangngarèna kabinna engko’ bân Ka’ Emmas Heru, Mas Heru aberri’ kembhâng ghenna’ bân jhâjhânna. Bâddhiyânna dhibi’na la nyiyappaghi sakabbhinna sabellunna mangkat.

Yâ Allah... jhâ’ sakènga abdhina èparèngè pèlèyan, abdhina ta’ mèlèya kembhâng bân jhâjhân panèka salanjhângnga, sokkor poko’ lakè abdina ghi’ bâḍâ è seddhi’na Abdhina.

Ghulungan sorat èbhughel ka kembhâng ghellâ’ aserrat tolèsan khassa Mas Heru.

“Assalamu’alaikum, Sayang. Pon marè dhika narèma jhâjhân kalabân kembhângnga? Senneng? Napè kabhârrâ sanonto? Masṭè pagghun raddhin. Bilâ sè dhika jhubâ’â? Èdhinè bulâ nga’-ngènga’è paḍâ kala awwâl bulâ bân dhika tatemmo.”

Engko’ ngonjhu’âghi nyabâ sabellunna nerrossaghi maca. Biyasana mowana engko’ semmo toḍus, nyatana pèra’ bâḍâ seksekka ḍâḍâ, peddhi, masèna paḍâna saèbu jhârum ètaccekkaghi ka ḍâḍâ.

“Bhâ’ taowa dhika, Sayang. È bâkto bulâ èyajhâk pamanna dhika èntar ka bengkona, bhuru ghârowa bhulâ nangalè bâbinè’ parabân raddhin kalabân ngangnghuy angghuyân SMA bân èpanangès è bâkto bhuru katemmo. Bulâ congoco sambi ngabâs obu’na sè èndhâ. Samolèna ḍâri ḍissa’ pamanna dhika nokol bulâ lantaran manangès ponakanna. Tapè, samènggu samarèna, pamanna dhika lajhunè ngoca’ kaso’on karana akherra dhika notop aurat kalabân samporna.”

Engko’ mèsem ngènga’è bâkto ghi’ bhuru katemmo rowa. Lalakè’ sè aghâbây èngko’ lèbur bân mengnga’ robâna paḍḍhâng è mata. Tapè, kamengnga’an jârèya aobâ è nalèka egko’ pegghel polana ngoca’ tang obu’ sè ègâmbâk ta’ ngangghuy koḍung. Oca’na sè nyakè’è atè kalabân sabâb jârèya mala Allah nonton engko’ sopajâ ngangghuy koḍung.

“Ḍu taon ta’ katemmo sakalè, lajhu akhèrra bulâ nemmo dhika kalabân obâ’ân sè samporna. Dhika lajhunè dhâddhi parabân sè shalèhah. Bulâ sè la aomor para’ tello polo taon kalabân ta’ ngabâs omor alamar dhika, siyap kalamon ta’ èkenḍâ’i. Tapè bulâ nèko parjurit, ta’ kèra nyorot sabellunna aperrang.”

Omorra engko’ pajhât kacè’ para’ sapolo taon. Tapè, parjhughâna kasorang Heru Parkasa ta’ kèra alèbâdhi engko’ sakonè’a.

“Bulâ saongghuna pon siyap ètola’, tapè Allah Maha Bellâs. Dhika narèma, napè saongghuna dhika pajhât la tarèsna, ghi, ka bulâ?”

Bhenḍer. Saongghuna engko’ pajhât la senneng sajjhâgghâ bhuru katemmo. Kapegghellân atas oca’na sè nyakè’è atè ta’ makala rassa tarèsna sè molaè tombu. Ḍu taon abhenḍem rassa ta’ tapak katemmo polè, terros dhibi’na ḍâteng matabâr kabhunga’an, arapa’a ma’ ta’ enḍâ’â.

“Dhâddi tang binè, mator sakalangkong sè rajâ.”

Kaulâ jhughân bhunga dhâddhi angghebbhânna panjenengngan, Mas.

“Sakalangkong ḍâ’ ka sakabbhinna èstona dhika kantos sanonto. Bulâ apangarep moghâ bulâ bân dhika terrosa langgheng tarèsna èsto è dhunnya, terros matè bân oḍi’ polè kaangghuy along-polong polè è swarghâ.”

Mator sakalangkong jhughân ḍâ’ sadhâjâ tarèsna bân èstona panjhennengngan majhângkep oḍi’na kaulâ, Mas. InsyaAllah... InsyaAllah kaulâ sareng panjhennengngan akompon polè è swarghâ.

“Bulâng na’-kana’ sopajâ dhâddhi orèng sè beccè’ paḍâna èbhuna, ghi. Bulâ ridâ’ ka dhika. Salam kerrong ḍâri bulâ ḍâ’ ka dhika ḍâri langgè’ kantos ka ḍâlemma saghârâ haha.”

Kaulâ ta’ kellar aghellâ’ maca soratta, Mas. Sabâb ampon onèng, saamponna panèka ta’ kèra mèreng polè ghuḍhâna panjhennengngan.

Salamet jhâlân, ḍu tang kakasè. Samporna ampon kawâjibhânna panjhennengngan abhâktè. Ma’ cè’ sennengnga Panjhennengngan ka saghârâ kantos tapangghi sareng ajâllâ è ka'ḍissa' jhughân.

Kaulâ ta’ onèng ponapa sè èlakonè Panjhennengngan paḍâ kala Malaikat Izrail rabu ka Panjhennengnan. Bâkto asaor? Ashalat sobbhu? Ashalat duha? Bâkto par-laparra apowasa? Ponapa saat abhuka?

Nagèng sèttong sè kaulâ yakin, Panjhennengngan samangkèng ampon senneng. Sabâb pangaterrona Panjhennengngan èngghi Syahid. Samangkèn Panjhengngan ampon Syuhada’, èdhikanè sareng Allah kalabân cara sè èndhâ marghâna samangkèn bulân moljâ. Sapanèka jhughân ca-kancana Panjhennengngan sè laèn.

Ghun pèra’ sapolo taon Allah aparèng bâkto asareng Panjhennengngan è dhunnya. Ajhânjhi, ghi. Saamponna panèka kita bhâḍhi asareng polè. Ta’ ghun coma sapolo taon. Antos kaulâ è bâng-labângnga swarghâ, Kaptèn!


Apa Komentarmu?

Komentar yang dirasa merugikan situs ini akan dihapus. Terima kasih telah berkunjung

Lebih baru Lebih lama