Tata Pentas Seni Pertunjukan

PANGAJHÂRÂN 5
Tema : Kasennèyan
Sennè Tatèngghun
Lalampa'an 3

Indikator
4.5.1 Melakukan penataan pentas sennè tatèngghun.
4.5.2 Mengelola pementaskan sennè tatengghun.
4.5.3 Mementaskan sennè tatèngghun tradisional
4.5.4 Mengunggah pemèntasan sennè tatèngghun ka internet.

Sumber gambar : Radar Madura Jawapos 

Teknik Penataan Seni Pertunjuakan (caraèpon ngajhum sennè tatengghun)

Ngajhum otabâ nata sennè tatèngghun biasa èsambhât kalabân tata teknik pentas èngghi panèka cara kadhiponapa abhâḍhi otabâ nata pangghung / pèntas otabâ kennengnganna tatèngghun.

Dhâddhi nata sennè tatèngghun otabâ tata teknik pentas èngghi panèka carana nata pangghung kaanghuy lalampa’an tatèngghun. Orèng sè bisa nata pangghung otabâ nata sennè tatèngghun ka’ḍinto èsambhât tokang pangghung otabâ oca’ samangkènna kreator.

Sabellunnèpon nata panggung langkong saè orèng sè nata pangghung panèka ghâḍhuwân ghâmbhârân otabâ konsèp ḍhimèn mènangka gherrogherrâ ḍâgghi’ manabi ampon ngalakonè panata’an pangghung. Sè ka’ḍinto konsèp ka’ḍinto mènangka pètodhu bân ghâmbhârân ḍâ’ orèng sè nata pangghung panèka nyopprè samporna dhâddhina.

Ghâmbhârân otabâ konsèp kèngèng èbhâḍhi kalabân ngaonèngè ḍhimèn ponapa bhângon èpon sennè tatèngghun sè bhâḍhi èlampa’aghi. Opamana sè bhâḍhi èlampa’aghi tatèngghun ludruk saamponna ka’ḍinto tantowaghi tèma sè bhâḍhi èlakonnaghi ḍâlem ludruk ghâpanèka, acarèta’a ponapa. Mèsalla sè bhâḍhi èlakonnaghi neng ludruk ghâpanèka carètana Rama Abhuru Kèddhâng, mèlana tata pangghungnga ḍâgghi’ kodhu nyaḍiyâ’âghi akadhi kellèr sè aghâmbhâr alas rajâ tor samacemmèpon.

Mèla ḍâri ka’ḍinto kèngèng èpoket sa’bellunna pangghung panèka èlakonè tata’annèpon mèlana sè parlo èsiyappaghi otabâ sè parlo èparanta ḍhimèng èngghi ka’ḍinto :

$ads={1}

1. Konsèp Pangghung
   Akadhi sè ampon èjhârbâ’âghi è yattas ghellâ’ jhâ’ konsèp panèka mènangka ghâmbhârân kaangghuy pètodhuna nata pangghung nyopprè ta’ kalèro kantos bisa dhâddhi tata pangghung sè bhâghus, èndhâ tor samporna.
   
   Manabi konsèp panèka ampon ranta tor sèpa’ mèla kasala’an sè bhâḍhi meddhâl nalèkana ngalakonè tata pangghung panèka bisa èsèngkalè otabâ bisa èminimalisir.
   
   Opamana okoran pangghungnga saponapa, kodhu ngangghuy pangghung tèngghi ponapa manḍhâp, aponapa pangghungnga cokok neng tanèyan bisaos bân salaènnèpon.
   
   
2. Tèma Carèta
   Tèma carèta ka’ḍinto jhughân kodhu èkaonèngè sareng orèng sè nata pangghung / kreator amarghâ tata pangghungnga ḍâgghi’ èpakadhi ponapa ka’ḍinto aghumantong ḍâ’ tèma carèta èpon.
   
   Opamana akadhi sè ècontowaghi ghellâ’ tèmana acarèta Rama Abhuru Kèddhâng mèla ḍâri ka’ḍinto sè nata pangghung panèka kodhu nyiyappaghi otabâ maranta tata pangghungnga kodhu akadhi sè bâḍâ neng alas rajâ.

Saamponna ḍuwâ’ parkara ghâpanèka ampon èkaonèngè tor èparanta ḍhimèn saterrossèpon sè parlo èsiyappaghi jhughân èngghi ka’ḍinto maso’ ḍâ’ ka bâgiyân pakakas otabâ matèrial akadhi angghuyân (kostum), beḍḍhâ’ (make-up), pakakas laèn (properti), pakakas sè ètegghu’ (hand properti), dekorasi, lampu (lighting), son (sound sistem).

Jenis-jenis Panggung (cem-macemma pangghung)

Pangghung aropa’aghi kennengngan sè èghuna’aghi nalèka tatèngghun panèka èlampa’aghi sè ka’ḍimma antarana sè ngagghit carèta, ḍhâlâng bân panjhâk èpatèngghu è aḍâ’na orèng sè ngoladhi. Macem pangghung sè biyasa èghuna’aghi èngghi panèka sèrap, pangghung arèna bân pangghung T. ḍâri bhângon pangghung panèka orèng sè nata pangghung bisa arancang otabâ nyoson pangghung sè bhâḍhi èlakonè kalabân saè.

1. Pangghung sèrap
   Pangghung sèrap panèka sè biyasa èyangghuy nèng è acara otabâ lalampa’an ponapa’a bisaos. Pangghung panèka èsambhât pangghung sèrap amarghâ sè èkatongko’è ètata ḍâri sèrap.
   
   Pangghung panèka bhângonna masaghi, sè soko bân cangghâna panèka èbhâḍhi ḍâri bessè sè bisa èbhungkar pasang kalabân cokop mokka’ bâut otabâ pangancèngnga. Dhinèng panongko’anna èbhâḍhi ḍâri sèrap èdhâkdhâk kantos sobung sèttonga lobâng.
   
   Tèngghina pangghung panèka acemmacem, aghumantong ḍâ’ ka èka’ḍimma pangghung panèka èmaddhek, manabi èpandhek neng tanèyanna compo’ èngghi ta’ patè rajâ bân ta’ patè tèngghi. Manabi èpaddhek neng è lapangan biyasana ngangghung pangghung sè lèbâr tor sè tèngghi.
   
   Orèng sè ngoladhi bâḍâ neng è yaḍâ’na pangghung adhârâp saè kèngnèng èparèngè korsè otabâ ngampar lama’ kèngèng jhughân jheng-manjheng.
   
   
2. Arèna
   Pangghung panèka biyasana ta’ ngangghuy pangghung akadhi sè èyattas ghellâ’, nangèng jhujhuk èlakonnaghi neng è tanèyan otabâ neng pèr-ampèran otabâ neng lapangan. Nata pangghung panèka cokop nata dekorasina tor pakakas sè èkaparlo neng pangghung panèka.
   
   Orèng sè ngoladi bâḍâ neng è lèng-lèngnga pangghung, sè ngolaghi cè’ semma’na ḍâ’ ka panjhâk sè amaèn. Pangghung panèka ta’ ngangghuy koḍung attassa ta’ akadhi pangghung sèrap ghellâ’.
   
   
3. Pangghung T
   Pangghung panèka akadhi pangghung sèrap nangèng bhidhâna bâgiyân aḍâ’na apngghung ètambâi malanjhâng ka aḍâ’ akadhi horop T saèngghâ orèng sè ngholadi bisa bâḍâ neng è pèngghir kangan bân kaccer èpon pangghung sè malanjhâng ghâpanèka.

Bagian-bagian Panggung (bâgiyân-bâgiyân pangghung)

Sennè tatèngghun bâgiyânna sè langkong ghenna’ èngghi panèka bâgiyânna pangghung. Bâng-sèbângnga bâgiyân panèka ghâḍhuwân ghuna bi’-dhibi’. Orèng sè nata pangghung kodhu ngaonèngè bâgiyân-bâgiyân panèka :

1. Bâtes pangghung. Biyasana bâtes pangghung panèka ngangghuy tabir sè bisa èyangka’ èpatèngghi tor èpamanḍhâp kaangghuy aparèng bâtes panjhâk sè amaèn sareng sè ngoladhi. Oca’ mangkènna èsambhât border.
2. Kellèr. Kaèn sè bâḍâ neng bingkèngnga pangghung sè bisa èghulung èpa ka attas ka bâbâ sè èlokès otabâ èghâmbhâr sorop kalabân tèma carèta èpon. Biyasana kellèr panèka bâḍâ pansaponapan bigghi’ sè biyasa aghântè sabbhân bhâbhâghân carèta. Opamana carètana bâḍâ è alas, kellèr èpon aghâmbhâr alas, manabi bâḍâ neng è po’-compo’, kellèr èpon jhughân aghâmbhâr compo’. Oca’ mangkènna èsambhât backdrop.
3. Canṭol. Èngghi panèka pakakassa pangghung sè bisa èpanyabâ’i otabâ èpaghântongngaghi bhârâng sè bisa èyèrsèt ka èrèng ka tengnga. Opamana canṭolanna emmik (mic).
4. Totop flies. Bâgiyânna attas pangghung sè bisa èpanyabâ’i lampu otabâ otabâ tata lighting.
5. Anḍhâ otabâ ḍhâk-onḍhâk. Èghuna’aghi kaangghuy ongghâ toronna panjhâk.
6. Pangkèng. Èghuna’aghi kaangghuy kennengnganna panjhâk asalèn angghuyân.

Pangaonèngan ngèngèngè tata pangghung panèka kodhu èkobâsanè sareng orèng sè nata pangghung (krèator) amarghâ manabi tata pangghungnga ta’ saè tanto tatèngghunna jhughân ta’ saè, korang èndhâ, ghun-pangghun, bânnya’ sè èlibâli, mala ta’ bisa ajhâlân kalabân saè jhughân tatèngghunna.

Bâḍâna pangaonènga tata pangghung panèka parlo èyajhâri amarghâ bisa andhâddhiyâghi sennè tatèngghung sajhân lèbur tor samporna.

Teknik Mengelola Seni Pertunjukan (Caraèpon Alampa'agi tor Malanggheng Sennè Tatengghun)

Manabi bhâḍhi alampa'aghi tor malanggheng sennè tatèngghun nyopprè sennè tatèngghun ta' ghâmpang èlang sèrna amarghâ bâḍâna kabhuḍhâjhân-kabhuḍhâjhân manca sè ampon ta' sorop/ ta' cocok sareng kabhuḍhâjhân Madhurâ, kodhu bâḍâ saghâlimpo' orèng/ organisasi. Sè ḍâlem organisasi ka'ḍinto kodhu:

1. Orèng sè nyeppowè organisasi/ produksi
   Ḍâlem sèttong organisasi tanto kodhu bâḍâ orèng sè nyeppowè/ pemimpin nyopprè organisasi kasebbhut bisa ajhâlan, teptep koko tor bisa katekkan ponapa tojjhuwânnèpon.
2. Bâḍâ tim
   Salaèn bâḍâ orèng sè nyeppowè kodhu bâḍâ tim. Amarghâ orèng sè nyeppowè ta' bisa ngastanè/ alako kadhibi'ân ta' kalabân èbhânto sareng tim.
3. Nantowaghi maksod, tojjhuwân tor sasaran
   Saamponna ampon èbhâḍhi organisasi sareng tim, kodhu nantowaghi maksod tor tojjhuwân tor sasarannèpon. Ponapa maksod tor tojjhuwân èbâḍâ'aghi sennè tatèngghun tor pasèra sasarannèpon. Ponapa kaangghuy rèd-morèd, morèd SD, SM, tor SMA, otabâ sasarannèpon ḍâ' sadhâjâ maghârsarè, sareng salaènnèpon.

Sè langkong parlo, sadhâjâ tim jhughân sè nyeppowè, alako kalabân nèyat sè èhlas kaangghuy alampa'aghi tor malanggheng sennè tatèngghun. Sobung tojhuwân laèn kaangghuy kaparlowan abâ'na dhibi' / kepentingan pribadi otabâ laènnèpon.

Teknik Pementasan Seni Pertunjukan (Caraèpon Alampa'aghi Pementasan Sennè Tatèngghun)

Caraèpon alampa'aghi pementasan sennè tatèngghun èngghi ka'dinto:

1. Nantowaghi sennè tatèngghun sè bhâḍhi èlampa'aghi.
2. Latèyan se cokop nypprè bisa alampa'aghi kalabân saè.
3. Nantowaghi kennengngan/ tempat.
4. Maranta kennengngan/ pangghung manabi bhâdhi alampa'aghi è attas pangghung, akadhi dekorasi, lampu, sound sistem, sareng salaènnèpon akadhi sè ampon èjhârbâ’âghi nen è yattas ghellâ’.

Teknik Mengunggah Seni Pertunjukan ke Internet (Caraèpon Nyabâ' Sennè Tatengghun ḍâ' Internèt)

Caraèpon nyabâ' sennè tatèngghun neng internèt ta' mabi èjhârbâ'âghi polè, amarghâ neng pangajhârân 2 semester ghânjhil ampon lastarè èjhârbâ'âghi. Manabi panjhennengngan ampon kaloppaè èyatorè maos polè è bâbâ ka’ḍinto.

Cara Mengaupload Ke Internet silahkan klik Teknik Mengunggah Cerpen ke Internet