Kumpulan Kata Kiasan Bahasa Madura

Arti Kata Kiasan / Oca' Kèyasan

Sumber Gambar : hippopx.com

Kata Kiasan otabâ oca’ kèyasan èngghi panèka oca’ sè bânnè sabhenḍerrâ otabâ kèngèng èkoca’aghi oca’ sè ghâḍhuwân artè sè ta’ samasṭèna kèngèng èkoca’ parsèmmon. Kabâḍâ’ânna bhârâng otabâ orèng è anḍhiyâghi ḍâ’ pa-ponapa sè bâḍâ neng alam, kappra èḍhâbuwâghi ḍâ’ ka orèng otabâ ḍâ’ ka kabâḍâ’ân.

Oca’ kèyasan èghuna’aghi kaangghuy aparèng rassa kaèndhâ’ân bân naḍhâ’âghi jhâ’ oca’ ghâpanèka langkong pentèng. Oca’ kèyasan / kata kiasan sègghut èpangghi neng kèjhung-kèjhung, puisi, syi'èr tor angghidhân kona.

Ḍâlem ajhârbâ’âghi oca’ kèyasan / kata kiasan, oca’ panèka mènangka bhujud bhâsa sè andhâddhiyâghi orèng ra-ngèra ponapa maksod bân tojjhuwân èpon.

Oca’ kèyasan / kata kiasan aropa sèttong bhângon bhâsa sè èghuna’aghi kaangghuy aparèng sèttong ma’na ḍâlem agghidhân sastra, sè ètotorraghi kalabân ta’ jhujhuk otabâ ètotorraghi kalabân oca’ majas.

Kumpulan Kata Kiasan Bahasa Madura

È bâbâ ka’ḍinto bhâḍhi èyatorraghi ḍâ’ ka panjhennengngan pan-saponapan okara kèyasan sè ècèpta tor ampon bârâta kalonta neng maghârsarè Madhurâ è jhâman ḍhimèn, nangèng samangkèn ampon rang-rang orèng Madhurâ aghuna’aghi oca’ kèyasan akadhi panèka kajhâbhâna rang-rang.

Mèla ḍâri ka’ḍinto kaulâ sareng panjhennengngan kodhu onèng tor kodhu malanggheng nyopprè ta’ èlangnga ca’-oca’ kèyasan akadhi panèka :

A - B - C - D - E - G - J - K - L - M - N - O - P - R - S - T - W

A

Acèṭak ḍuwa' artèna alora ḍuwâ'.
Acolo' ḍuwâ' artèna lècèkan.
Addhu aḍâ’ artèna atokar kalabân mosona patang aḍḍhep.
Addhu sèmmo artèna ngoca' ta' kalabân rang-terrangan.
Aèng malèng artèna aèng rajâ ḍâtengnga dhâk skala.
Aèng oḍi' artèna aèng sè aghili ros-terrosan taḍâ' nèmbhârâ' nèmorra.
Ajhuwâl abâ' artèna aghâbây malona abâ' dhibi'.
Ajhuwâl bibir artèna lem-ngalem bâḍâ maksoddhâ.
Alama' artèna orèng sè lakar ḍhâsar soghi.
Alu-bulu artèna orèng sè talèbat bânnya' otangnga.
Amaèn mata artèna ngabâs ḍâ' orèng sambi dhep-keddhebbhân anḍi' maksot bâḍâ sè èkakarep.
Amaèn pèssè artèna sabhârâng tèngka masțè majar.
Amata pèssè artèna bhân-sabbhân èsoro masṭè mènta opa.
Amosèngngè artèna na'-kana' nangèsan è bâkto malem.
Ana' emmas artèna ana' sè palèng èkasennengngè.
Ana' kaber artèna ana'na rèng alèm.
Ana' kompennè artèna sarḍâḍu bâlândhâ.
Ana' mandhi sarana artèna ana' coma sèttong ollèna pojjhâân.
Ana' mastèka artèna ana' sèttong èkajunjunè / ana' sèr-nesèrran.
Ana' ontang-antèng artèna ana' nongghâl ta' anḍi' tarètan.
Angèn malèng artèna angèn bhârât dâtengnga dhâk sakala.
Aora' kabâ' artèna orèng talèbât kowat bhâdhânna.
Aotang rassa artèna nyakè’è atèna orèng laèn. Biyasana èkoca’aghi nalèka bâḍâ orèng maèbir kakanan tapè ta’ matabâr.
Arabâs jhâlân artèna nyarè kabhâr bhâb parabân sè èpènta’a.
Arako' artèna nolong na'-kana' sè èdhina’aghi matè rèng towana.
Aramo' artèna abit è sèttong kennengngan.
Araobhi cemmer artèna tengkana ana' jhubâ’ aghâbây malo rajâ reng towana.
Arebbhu' tolang artèna bhârâng sè ta' arghâ.
Asampèr pènjhung artèna bârâghâddhâ orèng anḍi' ghâbây sè coma sakonè'.
Asaor mano' artèna nyambhit areng-bhâreng.
Asar maba artèna asar bâgiyân ka budina ra-kèra pokol 17.00 otabâ para’ sorop arè.
Asèlla arè artèna atana' otabâ ngakan la'-ella' marghâ ta' anḍi'. Saarè ngakan saarè ta' ngakan,
Atasmak bâlun artèna matè.
Atasmak bhâṭok artèna nè-mabannè ḍâ’ orèng sè cè' kennalla.
Atè malan artèna lekkas pegghel tapè lekkas sabbhâr.
Atèna cellep artèna sèḍḍhina èlang.
Atèna ghempèl artèna orèng takerjhât.
Atongket roman artèna oḍi' sampè cè' towana.
Atongket tebbhu artèna orèng lakè’ ajhâlânan ngèbâ binèna.

B

Bai' ḍâlem artèna na'-kana' sè palèng èkasènnengngè.
Bânjir ḍârâ artèna carok bânnya' sè matè.
Bâ'-sabâ' artèna kakanan, otabâ kembhâng èsabâ' è sèttong kennengngan èyangghep berrit.
Bengko lonang artèna bengko sè kangan kacèrra lebbi lanjhâng ḍâri aḍâ' ka buḍi.
Bhutak è alas artèna bânnya' pangataowanna, bânnya’ pangalamanna.
Biddhâng bângalan artèna biddhâng sè èyangka'aghi ka tamoy taḍâ' tambullâ.
Blurik perro' artèna jhubâ' atè.
Bulân kembhâr artèna orèng lakè-binè sè lakè’ gânṭèng sè binè' raddhin.
Buwâna atè artèna na'-kana' otaba orèng sè palèng èkasennengngè.

C

Cangghâ kalèkè artèna ranḍhâ sè alakè li-bâliyan.
Cangkaro' bâto artèna talèbat cerrè'.
Cangkèm lanḍu' artèna cangkèm lanjhâng.
Cobbhu' bhuco empa' artèna orèng sè bânnya' bhâlâna.
Colo' songay artèna ghârâmowan sakabbhinna kakanan maso'.
Colo bâlijjha artèna lècèghân.
Colo' binè artèna carèmè.
Colo' ḍulit artèna sè dhujân dhu-ngaddhu.
Colo' kopè' artèna colo' kènè’.
Colo' pasaran artèna cacana kotor.
Colo' sosop artèna colo' sè bibirrâ sèmmo ngajhul.
Compet pèkkèrra artèna ta' nemmo akal polè.
Copè' langngè'na artèna korang pangalamanna.

D

Dhâddhi bunto' artèna noro' buntè' malolo.
Dhâghing tomèmpèl artèna jhâu ḍâri bhâlâ.
Dhâstoma artèna orèng rajhâ caṭakka kène.
Ḍhingḍhing arè artèna bhator otaba sèrap sè èkaghabay totobbhâ rèng matè è kobhur.
Ḍung-tèḍung ajâm artèna tèḍung ta' tèḍung, otaba antara tèḍung bân ngèḍing.
Ḍung-tèḍung bhumè artèna bâkto malem antara pokol 02:00-03:00.

E

Èkasoko tanang artèna èkapèyat.
Èkettè' baling artèna bhâji’ sè parappa'na sake'.
Èlong kata' artèna èlong sè tèrpa'.
Èlong kenning artèna èlong sè konco'na rajâ.
Èlong kocèng artèna pa-apa sè ekakana èsèyomè ghâllu otabâ ngèḍing bhâi ka kennengnganna kakanan.
Èlong tomang artèna èlong sè konco'na sakonè malengkong ka attas (nyorngat).
Èng-aèngan artèna alangngoy.
Èrobbhuwi ghunong arterèa nyanḍhâng kacala’an otabâ nyanḍhâng kacalaka’an.
Ètonton lala' buta artèna sè èkaterrowè èkaollè kalabân ghâmpang.
Èyocol paju artèna ta' ènga'-kènga'è sakalè.

G

Ghâghâng bâru artèna orèng sè koros, tèngghi bân rèntèk.
Ghâghâng sakapor artèna orèng lakè-binè bânnè sana' bisa oḍi' rokon.
Ghâluḍhuk nèmor artèna rangrang ghighir tapè dhing karè ghighir nako'è.
Ghântè bâta’ artèna ka'-angka' sè ros-terrosan èyangka'aghi taḍâ' ambuna.
Ghâ-raghâ oḍâng artèna rè-sarèyan sè ta' tanto tojjhuwânna sabâb kennengnganna sè masṭè ta' èkataoè.
Ghâtel colo' artèna dhujân arasanan orèng.
Ghentang-nongngep artèna pangantan ḍujhuḍhu sè lakè' otabâ sè binè' ḍâri pasangan sè nomer sèttong tarètanna sè binè' otaba sè lakè' ḍâri pasangan nomer ḍuwâ'.
Ghilingan tèjhâ artèna taḍâ’ karèna pa-apa èkakan kabbhi.
Ghilir tampar artèna èsoro pas nyoro orèng laèn polè.

J

Jâ’-ghâjâ’ patè' artèna ghâjâ' sè pas dhâddhi tokar.
Jhâghâ rara artèna orèng lakè' binè akabin bâktona lancèng parabân.

K

Kabhâr angèn artèna kabhâr sè ta' tanto bhenḍer salana.
Kacolo'an artèna ghenḍhâk, sombong.
Kampowan sèkkem artèna orèng sè abit aghinḍhu' pegghel
Kapor bân ghulâ artèna orèng akanca sè kenṭella, ta' kennèng pèsa.
Kapotongan artèna katadâ'ân otabâ kapatèyan.
Kembhângnga dhisa artèna orèng sè palèng raddhin neng sèttong dhisa.
Kembhângnga naghâra artèna pahlawan.
Kembhângnga tokar artèna ma'-nyemma' pas atokar.
Kennyang mata artèna orèng sè lèbur nanèngghun ta' ènga' sè ngakana.

L

Labây potè artèna orèng sè èma’-ḍimma'a kennengngan èkasènnengngè orèng.
Lanjhâng colo’ artèna dhujân apètenna (afitna), maḍâpa'an rosèyana orèng.
Lanjhâng pamèkkèran artèna ta' dhuli motos panḍâ'. 

M

Mabâli copa artèna aberri' pa-apa ka ḍhukon sè nambhai panyakètta.
Mabuḍu' pèssè artèna maotang pèssè dhing nyerra kodhu alebbhi’i.
Maddhung to'ot artèna ngojhungè otabâ ngabhâktè.
Maghâr sarè artèna ra'yat.
Male' oca' artèna lecèk.
Manjhâlin cacèng artèna manjhâlin kène'.
Mata koḍḍhu' artèna pa-apa sè ètangalè ekaterroè.
Mata malèng artèna orèng sè ngas-bhalingasan.
Mata pellem artèna katonḍuwân, dhujân tèḍung.
Mata sapè artèna tellor sè è ghuring sè ta' èghubhek.
Mata somor artèna mata sè bighina ngadâlem.
Matè akal artèna sompek.
Matèngghi bhâu artèna angghâ', sombong.
Mèlè dhâghing artèna ta' adhil.
Mella' atè artèna tarbhuka, lekkas ngartè.
Mella' bujhellâ artèna cè' kennyangnga.
Mokka' bhârâna artèna mokka’ rosèya.

N

Nalè’è paghâr artèna mènta otabâ alamar parabân.
Nampanè pasa artèna apasa parmola’an bulân ramadhan.
Nellor bâlâng artèna orèng sè èlmona nga satengnga.
Nèmbhuk ghunong artèna ari'-berri' ka orèng soghi.
Nètè obu' salambâr artèna kodhu ngastètè sabâb bhâbhâjâ.
Ngala' nyama artèna terro alemman.
Nganḍung bhumè artèna para' ghâgghârâ ojhân.
Ngatopa' artèna na'-kana' sè lempo.
Ngeco' ghânḍhing artèna amarghâ kènè' èkèra masṭè kala tapè nyatana mennang.
Ngerra' nonowa artèna mon ta-mènta sè pas dhuli bâḍâ otabâ jhâk-ngajhâk pas dhuli noro' ḍhâksakala.
Ngokèr dhâlika artèna lalakon taḍâ’ ghunana.
Ngowan bâkto artèna pènter ngator bâkto.
Nyaghârâ artèna rèng pènter bânnya' èlmona.
Nyama dhâghing artèna nyama ghi kènè' na, otabâ nyama sokklana bânnè jhâjhuluk.
Nyambhel bijjhân artèna obu'na bânnya' obânna.
Nyandher ka apoy artèna nyemma' ka bhâbhâjâ.
Nyarè calaka' artèna nengnget sè nyanḍhânga calaka'.
Nyarè nyama artèna terro alemman.
Nyarè to'ot artèna èntar ngojhungè ka mattowa.
Nyolek mata artèna alako jhubâ' è yaḍâ’na orèng sè èkatoḍusi. 

O

Olat jhâmo artèna pangabâssâ orèng katonna mareḍḍeng malolo.
Otang mata artèna kan-ngakan ta' aberri' ḍâ’ orèng sè nangalè.
Otek bâto artèna ta' meḍḍâs bâburughân.

P

Paḍi merras artèna orèng pènter bân alèm.
Paghâr alas artèna paghâr geḍḍhung.
Paghâr kalaras artèna bhâreng sè ta' kennèng parcajâ.
Paghâr oḍi' artèna paghâr ḍâri ju-kajuwân sè ètamen.
Pajung ghunong artèna nembhâng sajhân abit sowarana sajhân ranyèng.
Palappa manjheng artèna palappa bungkol ta' èkocek èpasang ka jhuko'.
Pasar kojhu' artèna pasar sè rammèna coma sakejjhâ' dhuli lobâr.
Pèssè bâlin artèna pèssè sè abâli polè ḍâ' sè anḍi'.
Pèssè biyâ artèna pèssè pajhek.
Pèssè buḍu' artèna pèssè èpaotang ḍá' orèng laèn dhing nyerra kodhu lebbi.
Pèssè buta artèna pèssè sè itarèma orèng ta' kalabân alako.
Pèssè cara artèna pèssè sè ebâghi ḍâ’ orèng sè anḍi' ghâbây.
Pèssè cokè artèna pèssè cokè sè èbâjârrâghi ḍâ’ tongghu bakto amaèn.
Pèssè jhâbhân artèna pèssè kaangghuy taroan.
Pèssè ontalan artèna pèssè sè èbâghi ḍâ' komantan anyar otabâ sè abhâkalan sè amaèn ḍâ’ mattowana.
Pèssè osur artèna pèssè bâgiyânna pangolo sè makabin orèng.
Pèssè palsu artèna pèssè sè bânnè ghâbâyânna pamarènta.
Pèssè panas artèna pèssè ollèna amaèn.
Pèssè panebbhus artèna pèssè sè èghuna’aghi nebbhus bhârângga sè èpaghâḍhi.
Pèssè panjher artèna pèssè èbâjârrâghi ḍâ' orèng sè' ajhuwâl bhârâng tapè coma sakonè' jhâu ta' nyokobhi ḍâri arghâ bhârângnga.
Pèssè pojhurân artèna pèssè sè bâgiyân ḍâri mennangnga maèn.
Pèssè rajâ artèna pèssè sè ajhina rajâ.
Pèssè salabât artèna pèssè sè èbâghi ḍa' orèng sè alalabât, otamana ḍâ’ orèng sè nyalattaghi mayyit.
Pèssè sarana artèna pèssè sè èbâghi ka ḍhukon ongkossa sè mècet otabâ sè nambhâi.
Pèssè tampes artèna pèssè kène' sè bânnè ḍâri dhâlubâng.
Po-sapo poret artèna lamès.
Potè mata artèna malo. 

R

Rèyajâ artèna bulân hajji. 

S

Sakè' parèngan artèna sakè' cacar.
Salèp tarjhâ artèna pangantan ḍujhuḍhu sè lakè’ otabâ sè binè’ ḍâri pasangan nomer sèttong tarètan sè binè' pasangan sè nomer ḍuwâ'.
Sarè ghunong artèna robâna orèng binè’ katon raddhin mon èyabas ḍâri jhâuna.
Sarè taman artèna robâna orèng binè' katon raddhin mon èyabas ḍâri sèmma'na.
Satengnga tobu artèna omorra orèng sè ta’ cè' towana (35 - 45 taon).
Sèk-ressèk oḍâng artèna lowar bhersè tapè è ḍâlem gheddhâ’.
Sètan nompa' jhârân artèna ngala' sennengnga dhibi'.
Song-osong lombhung artèna lalakon sè èlakonè èkarobhudhi.
Sorat buḍek artèna sorat sè èkèrèm ta' kalabân nolès nyamana sè ngèrèng.

T

Tabu' tapès artèna orèng sè pangakanna bânnya'.
Taḍâ' matana artèna ta' bâs-ngabâs.
Taḍâ' paghârra artèna orèng towa ngolngol.
Tajhem oca'na artèna apa sè èkoca'aghi kadhâddhiyân.
Tana jhilâ bhâjâ artèna tana èyapèt songay.
Tana sabbhrâng artèna kennengngan ella' tasè'.
Tanang kețțang artèna calkoṭèk.
Tèmba kèrèng arèna taḍâ' ollèna pa-apa.
Tèpès bibirrâ artèna senneng apèsowan.
Tèpès kopèngnga artèna lebbi parcajâ dâ’ pètennana (fitna) orèng.
Tè-potè koḍḍhu' artèna onḍem pès-tèpès.
Ter-ater bilis artèna sè ngater èyaterraghi polè.
Tolang aḍu artèna tolangnga bettès bâgiyân aḍâ’

W

Wa-matowa artèna ḍâ’-mangaḍâ’.
Wa-towa ajâm artèna orèng bâbinè' sajân towa sajân raddhin.
Wa-towa pètè’ artèna orèng sè sajân towa sajân jhubâ'.