KUMPULAN PANTUN BAHASA MADURA

Sumber Gambar : piqsels.com

Samangkèng bhâdhân kaulâ bhâḍhi ngatorraghi pan-saponapan contona pantun Madhurâ sè ampon èpakompol ḍâri pan-saponapan sombher.

Dhinèng sè èsambhât pantun panèka ampon èjhârbâ’âghi neng matèri bhâsa Madhurâ sè abhul-ombhul JENIS DAN STRUKTUR PUISI.

Pantun panèka tamaso’ ḍâ’ ka macemmèpon puisi kona sè carana ngagghit kodhu apandhuman ḍâ’ gherrogher sè ampon ètantowaghi. Akadhi ghuru laghuna kodhu abhângon a-b,a-b otabâ a-a,a-a tor è ḍâlem sèttong paddhâ anḍhegghân (bait) bâḍâ 4 paddhâ/bhâris, paddhâ sèttong sareng paddhâ ḍuwâ' mènangka bhibhidhân (sampiran), dhinèng paddhâ tello' sareng empa' mènangka èssè.

Samoghâ pantun sè ampon èpakompol è bâbâ ka’ḍinto dhâddhiyâ lantaran sennengnga pangghâliyânna panjhennengngan pola bâḍâ sè karaddhu èyatorè ponḍhut nangèng sombherrâ kodhu jhâ’ paèlang.

Pantun sè bhâḍhi èyatorraghi ḍâ’ panjhennengngan è bâbâ ka’ḍinto ampon èpaghâlimpo’-ghâlimpo’ mètorot macemmèpon èngghi panèka :

Daftar Isi
PANTUN AGHÂMA
PANTUN BÂBURUGHÂN BECCÈ’
PANTUN NYARÈ ÈLMO
PANTUN LAKÈ BINÈ
PANTUN TARÈSNA
PANTUN PALEGGHIRÂN

PANTUN AGHÂMA

Calana napè, calana sè kona

Sè kona calana èsolam

Aghâma napè sè samporna

Sè samporna aghâma Islam

Mellè lonṭong labân èlat

Ngèbâ èlat arè satto

Sè sèttong maca syahâdât

Ḍuwâ’ shalat lèmâ bâkto

Ngèbâ calo’ arè salasa

Èkakana ghân sabhighi

Saamponna ḍâ’ ka Mekka

Ḍâ’ baitullah ongghâ Hajji

Namen bhâko mon èsèram

Najjân lesso bânnya’ obâng

Lamon ngako oreng Islam

Sabbhân bâkto wâjib bhâjâng

Lanjhâng panḍâ’ tolang roso’

Lem ḍâḍâna bâḍâ atè

Bhâjâng wâjib kalabân khoso’

Sowarghâna èkaollè

Ghân salonè mon nangkana

Èkakana kaḍuwâi

Ngalakonè parènta-Na

Laranganna èjhâuwi

Rèng tanè èntar ka kolla

Pamangkaddhâ bâjâ lagghu

Ngalakonè parènta Alla

Ghânjhârânna rajâ ongghu

Mellè temmo nemmo korma

Bâḍâ takèr ḍâun bhiru

Nyarè èlmo èlmo aghâma

Ta’ mèkkèr kennengngan jhâu

Ngèrat biḍhik ghân salonè

Kennèng èrat sambi nembhâng

Shalat wâjib èlakonè

Dhinèng sonnat yâ ta’ tobâng

Ka dhisa mellèya panḍân

Lèbâddhâ ajhâlân nèttèng

Apasa bulân ramadân

Abiddhâ sabulân bhentèng

Santrè ajhâr neng madrasa

Pamokka’ molaè alip

Molaè pajjhâr apowasa

Dhinèng abhuka ḍâpa’ mangrib

Mellè temmo ḍâ’ Narokan

Sakalasa pas èbâcco

Bânnè ghun ta’ ngènom ngakan

Rèng apasa nahan napso

Kapalla mattrussa sanga’

Tasèllem kakabbhi matè

Bhâttalla apasa bânnya

Orèng Islam bi’ tè-ngatè

Rantang potè èlapèsè

Rantang mèra lèbâr sara

Otang pèssè majâr pèssè

Orang pasa majâr pasa

Ghellângnga ḍâri salaka

Bhângonna apalè’ obi

Sèyangnga dhika apasa

Malemma dârus tarabi

Saropèya pèssè manat

Dhu’ummaghi ḍâ’ rèng ngemmès

Bâḍâ kèya pasa sonnat

Iyâ rèya sennèn bân kemmès

Nyassa marèna èsèram

Ka arèsan nyambu’ lottrè

Apasa hokomma haram

Neng tellasan iḍul fittri

Kalabbhina kennèng ghâut

Kalambu sabâ’ lomarè

Dhing pasana Nabi Dâud

Ta’ bu-ambu ella’ saarè

Nagghâ’ sabu bân komancèr

Èkakan mot-kelmodhân

Ajjhâ’ ragu bân kabâtèr

Pasana masèhat bhâdhân

Arè salasa ḍâ’ Tana Mèra

Ngèbâ marongghi bhâḍḍhâ talam

Marè apasa rèya apèttra

Nyokobhi rokonna Islam

Obhât mèra tambhââghi

Jhâ’ loppa dhuli assaèn

Zâkat pèttra dhu’ummaghi

Ḍâ’ fukara’ pakèr mèskèn

Kala’aghi no’ poterra

Korong kerrep ghâbây bâḍḍhâ

Orèng soghi ta’ apèttra

Jhâ’ ngarep maso’ sowarghâ

Dhâmar tèra’ èpoterra

Neng pang-pang aghântong tèngghi

Coma pèra’ majâr pèttra

Rèng sorang saghântang bhâi

Pèrèng talam èssè katkat

Èpatoron è tanèyan

Rèng Islam masṭè azâkat

Sataon nèng sakalèyan

Ajhâr silat ḍâlem ejjib

Messin oḍi’ lajhu nyettir

Majâr zâkat ampon wâjib

Ḍâri bhâji’ bhuru lahir

Kalènṭang buwâna marongghi

Èkella ta’ ḍhik lejjhâr

Ta’ ghâmpang dhâddhi rèng soghi

Zâkaddhâ wâjib èbâjâr

Atarèka ngokèr labâng

Samarèna nolès sorat

Sanḍhekka lakar lowang

Ambâ’ânna neng akhèrat

Ḍâ’ roma mangkat motorra

Sakabbhinna kèbâ’âghi

Ta’ coma azâkat pèttra

Sadâka jâriyâ iyâ bâghi

Ka panglèghur asakola

Lèbât koṭṭa masṭèyaghi

Sajân lèbur asadâka

Bherkat arta sajân soghi

Labun solam ghâbây lama’

Bhântalla èkèbâ’âghi

Rukun Islam kapèng lèma’

Ḍâ’ Baitullah ongghâ Hajji

Mara nèyat mellè sikat

La tekka’ patot ghighina

Sèra kowat dhuli mangkat

Ḍâ’ Mekka terros ka Madina

Ḍâri sabâ nèntèng kombhâ

Sè ngèbâ ḍing-tabhârinḍing

Atawâf alènglèng ka’bâ

Safa marwâ sa’i ngènḍing

Ajhâr massa’ kella cèlo’

Sajân lemma’ masang bujâ

Hajâr Aswâd neng mor lao’

Pancoran emmac neng è ḍâjâ

Buḍu’ dhârâ nyama pejji

Tomang bessè nyama kompor

Ngalakonè ibâdâ Hajji

Jhâ’ toman caca sè kotor

Ghâltè’ tèma keddhi’ ghâbul

Kalèmbângnga takaè’ mancèr

Tawâf sa’i bi’ tahallul

Tong-sèttongnga ajjhâ’ cèccèr

Neng sasaka pako bâut

Krènnèngan ghâgghâr ka bâbâ

Neng arofa alako wukuf

Kennengngan sè mustajâbâ

Ngala’ jita èbhit-sebbhit

Sambi mèkkèr èra-kerra

Musdâlifa wâjib mabit

Mèlè bikèr kaangghuy jumra

Palappa ana-bârna

Èpèyara ètanèyan

Musdâlifa pas ḍâ’ Mina

Lako jumra ta’ sakalèyan

Tèmon bhlungka’ cabbhi campor

Ella dhâddhi arojhâghâ

Lamon dhika hajji mabrur

Alla jhânjhi engghân sowarghâ

PANTUN BÂBURUGHÂN BECCÈ’

Ngala’ cobbhu’ bâḍḍhâ sèrè

Sèrè beccè’ temmo ora’

Bhupa’ bhâbhu’ kanèserrè

Jhâ’ sampè’ alabân oca’

Amènnya’a acokora

Asèsèr akaca tanto

Kaènga’è sè mèyara

Pèkkèr sossa tompang lesso

Ngala’ aèng labân maddhu

Dhuli totta’ kajhâmowa

Ḍâ’ rèng towa ana’ kodhu

Toro’ oca’ salanjhângnga

Klambhi potè sapa rowa

È tanangnga ngèbâ sorat

Mon abhâktè ḍâ’ rèng towa

Salamet dhunnya akhèrat

Mèghâ’ ebbhu’ arè satto

Arè ahad pamolèna

Bhupa’ bhâbhu’ ghuru rato

Èhormat ḍâ’ pèlèyanna

Abèca’an tor-taantor

Ngalèbâdhi patamanan

Sakanca’an kodhu akor

Bi lebbi satarètanan

Kalambi kotang èjhâi’

Sè ngarang orèng bâluto

Sè lebbi ghâmpang aberri’

Sè korang senneng èbhânto

Pèrèng cangkèr lem lomarè

Èsabâ’ ètata marè

Orèng mèskèn kanèserrè

Atana’ asella arè

Campor ba’mi pola bânnè

Jhâ’ palappaè bhâbâng tèmor

Silaturrahmi rèya lakonè

Nya’ rajhekkè lanjhâng omor

Ta’ ka ḍâpor ngala’ toḍi’

Lebbi serrèng sènga’ cambur

Anḍhâp asor èkaanḍi’

Kabbhi orèng paḍâ lèbur

PANTUN NYARÈ ÈLMO

Mellè temmo sabbhân lagghu

Pamolèna narèma sorat

Nyarè èlmo patarongghu

Kaangghuy sangona akhèrat

Ḍâ’ bâru terros pellèyan

Arè rebbhu ḍâ’ sarongghi

Ḍâ’ ghuru è sakola’an

Napè ḍhâbu èstowaghi

Ka kajhâr ka kalasan

Sakobhengnga bhângon bunter

Bhâjheng ajhâr ros-terrosan

Ombhâlânna tanto pènter

Nemmo tèmon bân dhâlima

Maḍḍhâ pèlè jhuluwâghi

Èlmo umum bân aghâma

Paḍâ sarè ongghuwâghi

Tèmon samangka konḍur cacca

Bhâḍḍhââghi pèrèng bunter

Lamon dhika lèbur maca

Bhâkal dhâddhi orèng pènter

PANTUN LAKÈ BINÈ

Orèng tanè ngonḍhu sokon

Aghâgghârân ghân sakonè’

Lakè binè kodhu rokon

Jhâ’ tokaran soal kènè’

Alajârân aèng kènè’

Pamolèna ngèbâ oḍâng

Pangasèlan nè’-sakonè’

Bâlânjhâna èpamenḍâng

Ngala’ ghentong ḍâ’ pamoro

Èsajjhâ’â kalagghuwânna

Sala sèttong anḍi’ kalèro

Sè rajâ’â pangabbhruna

Ètampanè maghi koran

Pamacana jhâ’ kabhuru

Lakè binè jhâ’ tokaran

Rajhekkèna lè ta’ jhâu

Ḍâ’ ḍâjâ mèghâ’â sapè

Ḍâ’ bârâ’ mèghâ’â jhârân

Ḍâ’ sadhâjâ jhâ’ kaloppaè

Sè èpènta kajhembhârân

PANTUN TARÈSNA

Ngerra’ koko ghân sakonè’

Klabân laddhing ḍâ’ paksèna

Sèra nèko dhika alè’

Prabân raddhin seḍḍhâ’ robâna

Ka taratè pajikaran

Terros ngara ḍâ’ ka lènteng

Sabbhân arè kèr-pèkkèran

Ngantos dhika ta’ ḍhik ḍâteng

Ka poterran ngèbâ koḍung

Ngèbâ sampèr kaèn jita

Kèr-pèkkèran ta’ ḍhing tèḍung

Sè èpèkkèr coma dhika

Jhuko’ jhubit jhuko’ tono

Palappaè jhâ’ papoṭṭon

Bulâ abit ta’ atemmo

Saarè rassa sataon

Samilyar tambâ saratos

Saèbu ghi’ ollèna kemma

Ta’ kellar bulâ sè ngantos

Kabhuru sè tatemmowa

Ḍâ’ bârâ’ bâḍâ sapèna

Bâḍâ ngotep cè’ kajâna

Jhâ’ kaberrâ’ dhika atèna

Bulâ tettep sè tarèsna

Ka bâluto lèbât talang

San-mèsan ḍâ’ ka sarongghi

Dhing èsto maḍḍhâ maèlang

San-rasan jhâ’ èḍingngaghi

Akalambhi bârna bhiru

Sè potè pegghâ’ talèna

Dhika jhâu bulâ jhâu

È atè taḍâ’ engghânna

Nyèkot klambhi kaèn kaci

È pabâli marghâ buḍḍhu

Dhika mojhi bulâ mojhi

Moghâ dhuli bâḍâ jhuḍhu

Asalebbâr bârna celleng

Sabbhu’ tanto paḍâ bâḍâ

Dhika ngombâr bulâ senneng

Ongghu èsto ta’ ḍhâ-kènḍhâ

Jhuko’ kopè’ jhuko’ bhândheng

Lalèma’ dhâddhi sasanga’

Nèko alè’ bulâ ḍâteng

Pasemma’ dhuli pasemma’

Ka ghunong ngala’ nyarowan

Tanto senneng ka maddhuna

Atè bhingong ta’ karowan

Bârinto rassana rèng tarèsna

Ngala’ bennang bâna nangka

È angghi’ padhâddhi kaèn

Bulâ senneng ḍâ’ ka dhika

Jhâ’ sampè’ bâghi rèng laèn

Romanna mon paḍina

Dhinèng toḍi’ iyâ laddhing

Èmanna mon ta’ dhâddhiyâ

Karè kolè kennèng seddhing

Ma’ olar olar alèngker

Olar sanca mara lenggen

Ta’ kellar bulâ sè nèser

Coma dhika ka ngen-angen

Ka pasara mellè kaèn

Kalambhi potè èsèkota

Ta’ kèra nyarè rèng laèn

Jhânjhi matè labân dhika

Bijjhân arta’ bârna bhiru

Soro soḍu ghân sabighi

Najjân ella’ tasè jhâu

Mon jhuḍhu masṭè apangghi

Rakara bâḍḍhâna ghulâ

Ghulâ potè ḍâlem kanṭong

Ta’ kèra pèsa bân dhika

Jhâbhâ matè sala sèttong

Kalambhina cè’ potèna

Èsèkot kalabân ghuntèng

Mon jhânjhina cè’ masṭèna

Sè ngantos samalem bhentèng

Mellè terrong ghân sasèbâ’

Billâ mata kajhâmowa

Sè kerrong ta’ kennèng tambhâ’

Bilâ kèya sè tatemmowâ

Sampèr sarong è bâḍḍhâna

Sè sèttong angghuy sapowan

Pèkkèr kerrong ka robâna

Atè bhingong ta’ karowan

Ka ghunong ngala’ nyarowan

Kopè bellâ kabâḍḍhââ

Atè bhingong ta’ karowan

Napè bulâ katambhââ

Mon mènnya’na mènnya’ solar

Mènnya’ messèn ampon sobung

Mon ènga’ rassa ta’ kellar

Sèyang malem ta’ nyeḍḍhâ tèḍung

Ka tajjhân molonga sabu

Paghâi’na ghâlâ pappa

Sanajjân lè’ paḍâ jhâu

Ta’ kèra bulâ sè loppa

Ḍâ’ kamar ngala’a sampèr

Bâḍâ ngotep sampè’ loka

Jhâ’ mangmang lè’ jhâ’ kabâtèr

Bulâ tettep anḍi’ dhika

PANTUN PALEGGHIRÂN

Ka Ghiliyâ ataḍâ ombâ’

Bâḍâ ombâ’ taḍâ’ ghilina

Abinèya taḍâ’ enḍâ’

Bâḍâ enḍâ’ taḍâ’ ghighina

Ngala’ lalang ngèbâ ghuntèng

Lalang panḍâ’ cè’ bânnya’na

Abâ’ palang bulâ tèttèng

Jhâlân taḍâ’ teppa’na

Ḍâ’ ngenḍâ’ ngajhumè tolang

Sajân segghut sampè’ nèlèng

Mon abâ’ nojjhunè palang

Gut-margut èsangka malèng

Dhâlima  mèra cè’ manèssa

Ètambi’ sambi rèng-mèrèng

Ḍimma bulâ ta’ ngennessa

Bâḍâ embi’ nopè solèng

Wâ-buwâân neng è sabâ

Kala’anna semmo ènṭèng

Kabâḍâ’ân pon aobâ

Bânnya’ tèkos nabâng kocèng

Sabbhân arè ghângan kangkong

Kerra’aghi ètong-potong

Kanèserrè lengngen tokkong

Akalambhi atong-ghâttong

Ma’ ellang ellangnga bhiru

Ellang potè mènta kokès

Ma’ palang palanga ghâllu

Sala bincè mata birkès

Ngarè’ lalang bhiru bhiru

Ngarè’ kangkong bâghi embi’

Abâ’ palang palang ghâllu

Karè nèngkong ta’ èberri’

Nyarè tolang ka ghir sèrèng

Pamèkolla not-pennodhân

Abâ’ palang lakè tèttèng

Dhing ajhâlân jet-onjeddhân

Mellè sabbhu’ ngèbâ ḍhuḍḍhut

Dhuli mangkat kèbâ pèssèna

Anapè tabu’ ma’ jeḍḍut

Kan jeḍḍut bâḍâ èssèna

Satèna ampon èpèkol

Lambâ’ mola èkasangkol

Nyamana lè-pèlè bukkol

Nyatana ollè rèng ḍhingkol

Mellè nangka sabâ’ cemmong

Èkakana sabâ’ ḍiyâ

Anapè dhika ma’ bhingong

Calanana panḍâ’ salajâ

Ollè sorat ḍâri bangko’

Kaḍung ghâmpang pas ètelko’

Malarat dhâddhi rèng bungko’

Tèḍung ghentang mara dhâlko’

Ka jâgâlân ngèbâ sapè

Sambhudhân panyèmbu otang

Sè ajhâlân ta’ tè-ngatè

Jherbhâdhân labu napang

Macco blinjo alè’-palè’

Namen terrong è tèngghina

Loco ongghu dhika alè’

Sala kelpong taḍâ’ ghighina