PANGALEMMA BADAN BAN PANYALENA

OCA' PANGALEMMA BHÂDHÂN BÂN PANYALÈNA

Sumber Gambar : manado.tribunnews.com

Oca’ pangalem saèstona ampon onèng èjhârbâ’âghi neng artikel otabâ materi sè abhul-ombhul Pangalemma Anggota Badan panjhennengngan bisa ngoladhi polè neng bhul-ombhul ghâpanèka.

Samangkèng bhâdhân kaulâ bhâḍhi nambâi pan-saponapan oca’ pangalem sareng oca’ panyalèna bhâdhânna manossa.

Oca’ pangalem panèka èghuna’aghi nalèkana bâḍâ orèng mojhi ḍâ’ bhâdhânna orèng laèn ta’ jhujhuk ètotorraghi nangèng ngangghuy oca’ kèyasan sè sakèrana kapèyarsa’anna bisa dhâddhi èndhâna. Sanarè akadhi panèka oca’ sè èpèlè ta’ sarombân oca’ nangèng kodhu akor sareng tegghessâ.

Sapanèka jhughân oca’ panyalè èghuna’aghi nalèkana bâḍâ orèng nyalè ḍâ’ bhâdhânna orèng laèng ta’ jhujhuk ètotorraghi kalabân salerressa nangèng ngangghuy oca’ kèyasan, saèngghâ orèng sè kacalè ta’ aromasa abâ’na ècalè.

È jhâman samangkèng manabi ètalèktèghi ampon rangrang orèng sè aghuna’aghi oca’ kèyasan panèka amarghâ ampon bânnya’ kana’ ngoḍâdhân sè ta’ ngaghâli ḍâ’ ka oca’ panèka.

Mèla ḍâri ka’ḍinto kaulâ aromasa cè’ parlona kaangghuy maḍâpa’ ca’-oca’ panèka ḍâ’ ka panjhennengngan sadhâjâ nyopprè ta’ èlangnga ca’-oca’ panèka.

È bâbâ ka’ḍinto ampon èpakompol pan-saponapan oca’ pangalem bân oca’ panyalè sè èponḍhut ḍâri pan-saponapan sombher tor ḍhâbuwèpon rèng kona.

Èyatorè manabi bisa ca’-oca’ panèka apallaghi nyopprè è buḍi arè manabi ampon èkaparlo bisa jhujhuk panjhennengngan angghuy nalèka èkabhuto kaangghuy ngalemma orèng otabâèpon nyalèya orèng.

OCA’ PANGALEMMA BHÂDHÂNNA MANOSSA

Nyamana	Pangalemma
Alèssa	Nangghâl sakalèan, Anḍâun mèmbhâ.
Atèna	Bhunga, Ayem, Kasokan.
Bângkongnga	Nakèr lèmas, Bhukor nongngèp, Manjhâng èlang.
Bettèssa	Poḍhâk nyongsang, Ngembhâng poḍhâk.
Bibirrâ	Jherruk salonè, Manggis ngarengngat, Dhâlima, Marekka.
Bâuna	Ro'om.
Bulu kèjhâ'na	Nyekkar tanjhung.
Bhâuna	Bhiḍhâng, Bhâu tèmbhângan.
Bhâdhânna	Bârâs, Seggher, Sèhat, Manjhângan rampèng.
Cacana	Paè' maddhu.
Ḍâina	Angapèṭèng, ḍai kapèṭèng.
Ḍâḍâna	Lapang ngaḍheppak, Jheppak.
Elongnga	Marsèng, Abhangngèr bâjâng, Ngaleppon nongko'.
Ghârighi'na	Angrajhung ḍuri.
Ghighina	Mangkar ranca', Abighi tèmon, Ambhâliling, Molu kombâng.
Ghellungnga	Ambhukot nongngep.
Kole'na	Anyèor ghâḍḍhing, Angheḍḍhang lomot, Ngonèng langsep.
Kakarebbhânna	Abhânṭèng tato.
Kaparèkasanna	Nyaop sèka’
Komèssa	Alala' nènggha’.
Kolè'na sè konèng	Emmas è sanglèng, konèng monḍhu.
Kolè'na sè celleng	Celleng manggis.
Lè'èrra	Ngalong tontonan, Angghulu manjhângan.
Matana	Mella' ta' mare, Bintang kartèka, Morka'.
Mowana	Ambulân Pornama.
Nasèbbhâ	Bhâjjrâ, Pojhur ontong.
Obu' bâlintèk	Malè' katopa'.
Obu' lanjhâng	Nyasar bângkong, Nyasar tombet, Anḍânandân.
Obânna	Nyambhel bijjhân.
Oḍi'na	Moljâ, Tremtem.
Palèmbâyyâ	Meltàs Manjhâlin.
Pajhâlânna	Nètèr kalènang.
Palèrègghâ	Bhânṭèng akèrèk.
Pangabâssa	Dhâmar kaangènan.
Paghèllâ'na	Mèsem bâlibis.
Partèngka’na	Anḍhâp asor.
Pangalamanna	Jhembhâr.
Paennengnga	Ngamantan anyar.
Palakona	Addreng parèkas, Bhânṭèng tato.
Pèkkèranna	Nyaghârâ, Ayem jhembhâr.
Parabâânna	Anyomampay, Mandhâ' bhumè, Gâgâ', Soghâ'
Pèpèna	Andhurin salènèng, Ngalompang.
Pokangnga	Abaru loros, Mokang jherring.
Ropana	Raddhin, Gânṭeng.
Rokonna	Kanṭa mè-èmè bân mèntona.
Sosona	Nyengkèr ghâḍḍhing.
Sowarana	Lemma' manès, Aghur.
Sokona	Ngokot manjhângan.
Sèpatta	Bellâsân, Sabbhâr, Lambhâ'.
Tengngana	Angghâghâttèng.
Tombeddhâ	Nellor Mano'.

 

OCA’ PANYALÈNA BHÂDHÂNNA MANOSSA

Nyamana	Panyalèna
Alèssa	Ngola' bhulu.
Bângkongnga	Tèpos, Sèrpot.
Bettèssa	Ḍâber, Berber, Kèras.
Buri'na	Sèpèt, Nojjhing, Kancot.
Bujhellâ	Akennong, Budhung
Bughiggha	Sangko', Bungko', Tekkok.
Bibirrâ	Dhâlbik, Dhângngèr, Ghâlbâ.
Buluna	Nyarenggi.
Bhâuna	Aponok, Abhutol.
Cangkèmma	Cangkè', Nyakèl.
Cètakka	Anyèor bâghung, Benjut.
Colo'na	Macoccong, Marongos, Pèrot, Manyonyot.
Ḍâina	Nonong, Ghânol.
Dâḍâna	Amano' ngaḍâk.
Èlongnga	Pèse', Mergâng, Pernong.
Ghârighi'na	Koṭol, Kèṭṭèng.
Ghighina	Dhângnga', Rongghâ, Nyorngat.
Kokona	Lanṭèk, Pèlaren.
Komèssa	Jârâmbeng.
Kopèngnga	Koper, Mekkar.
Kolè'na	Bhellâng, Lampang, Rangas, Kèrkèr.
Lè'èrra	Langgâ', Pèrket.
Lengenna	Ḍhingkol, Cèkot.
Matana	Lènglang, Bhulâk, Kèler.
Mowana	Pocet, Pejjâs, Pellay, Carokko.
Obu'na	Nyarenggi, Jârumbun, Gherrâ.
Parobâânna	Ta' oḍhes, Ta' ḍhessa, Gherrâ, Règgik.
Pokangnga	Loros.
Pèpèna	Kèlpot, Kèlpong.
Roso'na	Ngarantang.
Ropana	Jhubâ'.
Sokona	Nyebbhir, Ajârâpa.
Sowarana	Sengngong, Sengseng, Perrè'.
Tabu'na	Ghilbât, Jeddut, Meldis, Kèlpong, Kelpès.
Tanangnga	Kasar, Rangas.
Tengngana	Ngejjeng, Tekko’, Bungko’.
Tèngkeltènganna	Bengbeng.
To'oddhâ	Rèngkot, Ghaṭèk.
Tombeddhâ	Nyebbir, Nerbâk, Nèrbak.

 

Saka’ḍinto ca’-oca’ pangalem bân ca’-oca’ panyalèna bhâdhânna manossa sè bisa bhâdhân kaulâ atorraghi ḍâ’ ka panjhennengngan sadhâjâ.

Manabi bâḍâ ca’-oca’ sè laèn ḍâri ca’-oca’ è yattas ngèrèng èyatorè tolès neng kolom komèntar nyopprè bisa èpamaso’ jhughân ḍâ’ ka ghâlimpo’na oca’ ghâpanèka.

Akhèr okara, ngèrèng kaulâ jhâk-ngajhâk ḍâ’ ka panjhennengngan kaangghuy bisa ngèrèng jhughân noro’ pato malanggheng dhâdhingghâlânna rèng seppo otabâ rèng kona.

Ka’ḍinto parlo terros è siyarraghi ḍâ’ ka sadhâjâ ngangoḍâdhânna rèng Madhurâ, nyopprè sajân bânnya’ orèng sè senneng ajhâr tor mertè bhâsa Madhurâ panèka.

Manabi kaulâ sareng panjhennengngan ta’ parduli ḍâ’ ka parkara ka’ḍinto èngghi tolos bhâsa Madhurâ panèka bisa èlang mosna ta’ kalabân bâḍâ karèna sanajjân sakonè’.

Sè langkong parlo èngghi panèka kaulâ sadhâjâ bisa ngabidhi ḍâri bhâlâ karabhât dhibi’, manabi sadhâjâna orèng Madhurâ ana’ potona èyajhâri bhâsa Madhurâ kalabân saè tor lerres masṭèna kakabâtèranna para seppo, para pamertè bhâsa Madhurâ ta’ kèra kadhâddhiyân.

oca' pangalemma bhâdhân bân panyalèna

oca' pangalemma badan ban panyalena

oca' pangalemma beden ben panyalena