Struktur Teks Pidato

PANGAJHÂRÂN 3
Tèma : Kaaghâma'an
Piḍato
Lalampa’an 4

Indikator
3.3.3 Mengidentifikasi Struktur Teks Piḍato
3.3.4 Menganalisis Struktur Teks Piḍato

Piḍato èngghi ka'ḍinto ngatorraghi pangghâliyân sè abhângon ca'-oca' otabâèpon okara sè ètojjhuwâghi ḍâ' orèng bânnya'. Tantowepon ḍâlem piḍato ka'ḍinto bâḍâ maksot otabâèpon tojjhuwân. Mèla ḍâri ka'ḍinto, nyopprè Piḍato kaator kalabân marlowaghi anṭat/ sosonan piḍato.

Prandhinèng anṭat piḍâto èngghi ka'ḍinto:

1. Salam pamokka'
   Salam pamokka' salaèn aèssè salam "assalamu alaikum warahmatullahi wabarakatuh" jhughân aèssè okara pamokka'. Okara pamokka' aèssè ngatorè kamoljâ'ân sadhâjâ sè ampon rabu ḍâlem lampa kasebbhut, èkabidhi ḍâri sè langkong (palèng) tèngghi dhârâjhâddhâ kantos sè palèng mabâ dhârâjhâddhâ.
2. Pojhi sokkor
   Okara pojhi sokkor cè' parlona èyatorraghi mènangka sala sèttong pangabhâktè bhâdhân kaulâ sareng panjhennengngan ḍâ’ Allah mènangka kabulâèpon. Mala langkong saè ètambâi ngatorraghi solawat sareng salam ḍâ’ Ghustè Kanjing Nabi Muhammad ﷺ.
3. Èssè
   Èssè èngghi ka'ḍinto èssèna piḍato sè palèng parlo (isi pokok Piḍato). Ponapa maksod otabâ tojjhuwân ngatorraghi piḍâto.
4. Okara pongkasan
   Okara pongkasan ka'ḍinto aèssè pongkasan pangghâliyân (kesimpulan), pangarep-pangarep, ngatorraghi mator sakalangkog, jhughân kodhu nyo'on sapora sadhâjâ kasala'an, kacangkolangan, kajânggâlân sareng samacemmèpon tor èpongkasè/ èyahèrè kalabân salam pongkasan (salam panotop).

$ads={1}

Èyatorè maos tor talèktèghi conto piḍato sambhudhân è bâbâ ka'ḍinto!

Assalamu alaikum warahmatullahi wabarakatuh.

Para alèm ulama', para kyaè, kong-langkong kyaè Musleh Adnan sè rabuwèpon ḍâri Pamekkasan sè bhâdhân kaulâ amoljâ'âghi jhughân bhâdhân kaulâ ta'atè.

Bapa' lora Cabang Dinas Provinsi Jawa Timur Wilayah Kabupaten Situbândâ sè bhâdhân kaulâ amoljâ'âghi jhughân bâdhân kaulâ ta’atè.

Bâpa' lora sakola'an SMA Negeri 1 Panarokan sè badhân kaulâ amoljâ'âghi jhughân bhâdhân kaulâ ta’atè.

Bapa' Èbhu ghuru, Bâpa' Èbhu Staf TU sè bhâdhân kaulâ amoljâ'âghi.

Bâpa' lora komite sareng anggotaèpon sè bhâdhân kaulâ amoljâ'âghi, sadhâjâ para rabu sè bhâdhân kaulâ amoljâ'âghi.

Para kanṭè SMA Negeri 1 Panarokan sè samè ghumbhirâ.

Mator rancanganna bhâdhân cangkolang, bhâdhân kaulâ komalancang tor-mator è ajunannèpon para rabu. Kabidhân ator, ngèrèng bhâdhân kaulâ sareng para ajunan samè matongrap okara pojhi sokkor Alhamdulillah ḍâ’ ajunannèpon Allah sè Maha Aghung, amarghâ bhâdhân kaulâ sareng para ajunan salagghi' èparèngè kasèhadhân tor kanè'madhân, kong-langkong nè'mat iman sareng Islam kantos bisa rabu tor aghi-pangghi è kennengngan ka’ḍinto ḍâlem lampa Ngaèmodhi Bhâbhârrèpon Kanjing Nabi Muhammad ﷺ otabâèpon Maulidun Nabi.

Para rabu sè same èmoljâ'âghi Allah.

Bhâdhân kaulâ rassana ngembhâng bhâko, cè' bhungana, saghunong emmas bhâbhânḍhingannèpon amarghâ Bâpa' Èbhu ghuru, tor para rabu ampon soddhi rabu tor alongghu jhimet parjughâ è kennengngan ka'ḍinto. Tantowèpon è sa'at samangkèn bhâdhân kaulâ sareng para ajunan rabu tor apol-kompol è kennengngan ka'ḍinto, buwâ cèlo', samè ngalècèr syâfa'attèpon Kanjing Nabi Muhammad ﷺ. Bulân Rabiul Awal ka'ḍinto aropa'aghi bulân bhâbhârrèpon ghustè Kanjing Nabi kalerressan tangghâl 12 Rabiul Awal taon Ghâjhâ. Kanjing Nabi èbhâbhârraghi ḍâ’ alam dhunnya kalabân abhâkta rahmat, èngghi ka'ḍinto aghâma Islam, kantos ka bhâdhân kaulâ sareng para ajunan, ḍhimèn bâḍâ è alam jahiliyah, petteng calèmodhân, nojjhu alam sè tèra' tor saè, kantos bisa abhidhâ'âghi sè ka'ḍimma sè saè tor sè ka'ḍimma sè korang saè otabâèpon ta' saè. Kanjing Nabi kaonang ngaghungè tatakrama sè saè, anḍhâp asor, bijâksana jhughân ta' marlowaghi salèraèpon/ abâ'na dhibi'. Mèlaèpon patot tor wajib rassaèpon manabi Ghustè Kanjing Nabi èpadhâddhi kaca kebbhâng mongghu ḍâ' bhâdhân kaulâ sareng para ajunan sadhâjâ

Malar moghâ kalabân bâḍâna lalampan ngaèmodhi bhâbhârrèpon Gustè Kanjing Nabi ka'ḍinto, bhâdhân kaulâ sareng para ajunan bisa meṭṭèk hèkmah lalampan ka'ḍinto kong-langkong bisa meṭṭèk hèkmah ḍhâḍhâbun sè bhâkal èḍhâbuwâghi sareng salèrana sè moljâ Kyaè Musleh Adnan, kantos bhâdhân kaulâ sareng para ajunan tettep lolot asè lampaèpon.

Para rabu sè èmoljâ'âghi Allah.

Bhâdhân kaulâ mènangka panitia, abâkkèlè para kanṭè panitia sè laèn, ngatorraghi mator sakalangkong sè cè' rajâna ḍâ’ sadhâjâ Bâpa' Èbhu ghuru jhughân para rabu sè ampon soddhi rabu è sa'at samangkèn. Ta' kalèp jhughân bhâdhân kaulâ ngatorraghi mator sakalangkong sadhâjâ sè ampon aparèng bhântowan jhughân samè ghutong rojhung ḍâlem lampa ka’ḍinto. Malar moghâ sè ampon rabu jhughân sè ampon abhânto kantos lampa ka’ḍinto kalampan è sa'at samangken, malar moghâ kacaṭeddhâ mènangka tambâna amal ibâḍâ sareng Allah jhughân kèngènga safa'attèpon Nabi Muhammad ﷺ. Amin.....!

Para rabu sè same èmoljâ'âghi Allah,

Tantowèpon ḍâlem lampa ka’ḍinto bânnya' kasala’an, kakorangan, kacangkolangan tor katoppalan, ngabidhi sè kabidhân kantos pongkasannèpon lampa, asampèr pènjhung kadhi ka'ḍinto, pramèla bhâdhân kaulâ sareng para kanṭè panitia nyo'on sapora sè sarajâ-rajâèpon.

Saka'ḍinto pamator, nyo'on sapora sadhâjâ kacangkolangan, kasala'an, sola tèngka sè korang sondhuk mongghu pangghâliyânnèpon para rabu.

Sèrèna ma' ampon konèng

Roko' èskot bârna mèra

Serrèna kaulâ ta' onèng

Sala lopot nyo'on sapora

Wassalamu alaikum warahmatullahi wabarakatuh.