Niat Zakat Fitrah

Niat merupakan kunci dari sah atau tidaknya sebuah ibadah, baik itu ibadah wajib atatupun yang sunnah semuanya harus diawali dengan niat. Bila suatu amalan tidak diawali dengan niat maka amalan tersebut dianggap tidak sah atau tertolak. Begitupun pelaksanaan Zakat Fitrah yang wajib ditunaikan oleh setiap individu umat Muslim baik laki-laki, perempuan, dewasa, anak-anak, merdeka ataupun budak.

Kawâjibhânna Anèyat (kewajiban niat)

Sadhâjâna amal ibâdâ panèka kodhu èlampaaghi kalabân nèyat. Bânnè ghun pèra' ibâdâ sè wâjib, jughân sanajjân ibâdâ sè sunnat wâjib anèyat. Manabi ibâdâ ta' kalabân anèyat mèla ibâdâ ghâpanèka ta' èyangghep otabâ ta' ètarèma. Amarghâ nèyat panèka bhunggherrâ sadhâjâ kalakowan ibâdâ, akadhi sè ampon èḍhâbuwâghi sareng Kanjing Nabi Muhammad ﷺ :

عَنْ أَمِيْرِ الْمُؤْمِنِيْنَ أَبِيْ حَفْصٍ عُمَرَ بْنِ الْخَطَّابِ رَضِيَ اللهُ عَنْهُ قَالَ: سَمِعْتُ رَسُوْلَ اللهِ صلى الله عليه وسلم يَقُوْلُ: إِنَّمَا اْلأَعْمَالُ بِالنِّيَّاتِ وَإِنَّمَا لِكُلِّ امْرِئٍ مَا نَوَى. فَمَنْ كَانَتْ هِجْرَتُهُ إِلَى اللهِ وَرَسُوْلِهِ فَهِجْرَتُهُ إِلَى اللهِ وَرَسُوْلِهِ، وَمَنْ كَانَتْ هِجْرَتُهُ لِدُنْيَا يُصِيْبُهَا أَوْ امْرَأَةٍ يَنْكِحُهَا فَهِجْرَتُهُ إِلَى مَا هَاجَرَ إِلَيْهِ.

Artèna : 

Èriwâyâddhâghi ḍâri Amirul Mu'minin abi Hafs Umar bin Khatthab radiyâllahu 'anhu aḍhâbu : engko' ngèḍing Rasulullah ﷺ aḍhâbu : Saongghuna sabhhân-sabbhân kalakowan arèya aghumantong ḍâ' nèyatta. Bân saongghuna sabbhân-sabbhân orèng (bhâkal èbâles) aghumantong ḍâ' apa sè ènèyattaghi, sapana orèng sè hijrah karana Allah bân Rasullâ, mèla hijrana mongghu ḍâ' Allah bân Rasullâ, bân sapana orèng sè hijrana karana terro dhunnya mèla bhâkal ngaollè dhunnya, otabâ karana bâbinè' mèla bhâkal èkabin, mangka hijrana aghumantong ḍâ' ka apa nèyatta. (HR. Imam Bukhari).

$ads={1}

Dhâddi nèyat panèka langkong parlo tor wâjib ḍâ' ka pa-ponapa bisaos manabi ngalakonana amal ibâdâ karana ka'ḍinto bhunggherra otabâ saratta ponapa amal ghâpanèka katarèma ponapa bhunten. Sapanèka jhughân amal ibâdâ Zâkat Fitrah (pèttra), karana samangkèn bulân powasa ampon para' ḍâpa'a ka bulân sabâl mèla kaulâ sadhâjâ kodhu mod-maèmod otabâ ngènga'è ḍâ' ka nèyatta pèttra.

Kawâjibhânna Azâkat Pèttra (kewajiban zakat fitrah)

Muhammad bin Qasim al-Ghâzi ḍâlem kètab Fathul Qarib ajhârbâ'âghi, bâḍâ tello kabâḍâ'ân orèng Islam panèka wâjib makalowar pèttra èngghi panèka :

1. Islam
2. Ngaghungè bâkto wajibbhâ pèttra, èngghi panèka è akhèr ḍâri bulân powasa bân awwâl ḍâri bulân sabâl. Orèng sè sobung omor (sèdhâ) sabellun tangghâl 1 bulân sabâl otabâ bhâji' sè èbhâbhâr saamponna bulân powasa ta' wâjib èpakalowar pèttrana.
3. Ngaghungè ḍhâ'ârân pokok sè alebbi'i ḍâri kabhutowanna dhibi' bân bhâlâna (raji bân pottra-pottrèna) è bâkto arè tellasan otabâ malemma.

Sanarè wâjib makalowar pèttra, ta' sadhâjâna orèng panèka nangghung pèttrana abâ'na dhibi', opamana ano ngaghungè tangghungan kaangghuy aparèng nafkah ḍâ' ani, ano wâjib makalowar pèttrana ani. Contona rèng seppo lakè' (eppa') panèka wâjib makalowar pèttrana tra-pottrana sè dhâddhi tangghungan nafkah-èpon.

Dhinèng nèyat panèka langkong parlo katèmbhâng èjâb-qabul è ḍâlem makalowar pèttra. Sabâb pèttra panèka bânnè parkara akadhi dhâghângan (akad), pèttra panèka aropaaghi paparèng ḍâri orèng sè wâjib makalowar pèttra ḍâ' ka orèng sè kèngèng narèma. Salaènna ka'ḍinto orèng sè narèma pèttra sobung sarat kaangghuy aparèng manfaat ḍâ' ka sè aparèng pèttra, amarghâ panèka nèyat ḍâlem zâkat pèttra panèka wâjib.

Sananjjân nèyat panèka kennengnganna neng è atè, nangèng talaffudz (alaffddahâghi) panèka langkong èanjurrâghi karana bisa abhânto atè kaangghuy pategghes nèyat, sopajâ kowat nèyat sè bâḍâ è atè.

Okara Nèyat Zâkat Pèttra (lafadz niat zakat fitrah)

È bâbâ ka'ḍinto pan-saponapan macemma lafadz nèyat zâkat pèttra :

Nèyat zâkat pèttra kaangghuy abâ' dhibi' : 

ﻧَﻮَﻳْﺖُ اَﻥْ اُﺧْﺮِﺝَ ﺯَﻛَﺎﺓَ ﺍﻟْﻔِﻄْﺮِ ﻋَﻦْ نَفْسِيْ ﻓَﺮْﺿًﺎ للهِ ﺗَﻌَﺎﻟَﻰ

Artèna : Nèyat kaulâ makalowar zâkat pèttra ḍâri abâ' kaulâ dhibi' fardu karana Allah taala.

Nèyat zâkat pèttra kaanghuy binè :

ﻧَﻮَﻳْﺖُ اَﻥْ اُﺧْﺮِﺝَ ﺯَﻛَﺎﺓَ ﺍﻟْﻔِﻄْﺮِﻋَﻦْ ﺯَﻭْﺟَﺘِﻲْ ﻓَﺮْﺿًﺎ للهِ ﺗَﻌَﺎﻟَﻰ

Artèna : Nèyat kaulâ makalowar zâkat pèttra ḍâri binè kaulâ fardu karana Allah taala.

Nèyat zâkat pèttra kaanghuy ana' lakè' :

ﻧَﻮَﻳْﺖُ اَﻥْ اُﺧْﺮِﺝَ ﺯَﻛَﺎﺓَ ﺍﻟْﻔِﻄْﺮِ ﻋَﻦْ ﻭَﻟَﺪِﻱْ ... ﻓَﺮْﺿًﺎ للهِ ﺗَﻌَﺎﻟَﻰ

Artèna : Nèyat kaulâ makalowar zâkat pèttra ḍâri ana' lakè' kaulâ (sebbhut nyamana) fardu karana Allah taala.

Nèyat zâkat pèttra kaanghuy ana' binè' :

ﻧَﻮَﻳْﺖُ اَﻥْ اُﺧْﺮِﺝَ ﺯَﻛَﺎﺓَ ﺍﻟْﻔِﻄْﺮِﻋَﻦْ ﺑِﻨْﺘِﻲْ ... ﻓَﺮْﺿًﺎ للهِ ﺗَﻌَﺎﻟَﻰ

Artèna : Nèyat kaulâ makalowar zâkat pèttra ḍâri ana' binè' kaulâ (sebbhut nyamana) fardu karana Allah taala

Nèyat zâkat pèttra kaanghuy abâ' dhibi' bân sadhâjâ bhâlâ bhârunḍhut sè ètangghung nafkana :

ﻧَﻮَﻳْﺖُ اَﻥْ اُﺧْﺮِﺝَ ﺯَﻛَﺎﺓَ ﺍﻟْﻔِﻄْﺮِ عَنِّيْ ﻭَﻋَﻦْ ﺟَﻤِﻴْﻊِ ﻣَﺎ ﻳَﻠْﺰَمُنِيْ ﻧَﻔَﻘَﺎﺗُﻬُﻢْ ﺷَﺮْﻋًﺎ ﻓَﺮْﺿًﺎ للهِ ﺗَﻌَﺎﻟَﻰ

Artèna : Nèyat kaulâ makalowar zâkat pèttra ḍâri abâ' kaulâ dhibi' bân ḍâri sadhâjâ sè nafkana ètangghung kaulâ fardu karana Allah taala

Nèyat zâkat pèttra kaanghuy orèng sè èbâkkèllaghi :

ﻧَﻮَﻳْﺖُ اَﻥْ اُﺧْﺮِﺝَ ﺯَﻛَﺎﺓَ ﺍﻟْﻔِﻄْﺮِ ﻋَﻦْ (....) ﻓَﺮْﺿًﺎ للهِ ﺗَﻌَﺎﻟَﻰ

Artèna : Nèyat kaulâ makalowar zâkat pèttra ḍâri ... (sebbhut nyamana) fardu karana Allah

Orèng sè narèma zâkat pèttra èsunnattaghi adhuwâ'âghi orèng sè aparèng zâkat kalabân dhuwâ-dhuwâ sè bhâghus. Dhuwâna kèngèng èyoca'aghi kalabân bhâsa ponapa bisaos sè sakèrana èkaghâli. Contona akadhi panèka :

ﺁﺟَﺮَﻙ اللهُ ﻓِﻴْﻤَﺎ ﺍَﻋْﻄَﻴْﺖَ، ﻭَﺑَﺎﺭَﻙَ ﻓِﻴْﻤَﺎ ﺍَﺑْﻘَﻴْﺖَ ﻭَﺟَﻌَﻠَﻪُ ﻟَﻚَ ﻃَﻬُﻮْﺭًﺍ

Artèna : Moghâ Allah aparèng ghânjhârân ḍâ' ka paparèngnga panjhennengngan, bân moghâ Allah aparèng bherkat ḍâ' arta sè panjhennengngan sèmpen tor andhâddhiyâghi panyoccè ḍâ' ka panjhenengngan.

Alafaddhâghi oca' Arab ka'ḍinto ta' andhâddhiyâghi kawâjibhân, sanaossa nèyatta panèka ngangghuy bhâsana dhibi' pagghun essa zâkat pèttrana.