Sala Ta' Ètemmo Orèng

Sopajâ panjhennengngan langkong ngaghâli ḍâ' ka paponapa sè ampon èjhârbâ'âghi è pangajhârân Struktur Teks Cerpen mèlaèpon panjhennengngan kodhu maos kalabân nalèktèghi bâca'aan è bâbâ ka'ḍinto!

SALA TA' ÈTEMMO ORÈNG

Abstrak

È sèttong dhisa bâḍâ orèng lakè' sè asmaèpon Nurdin. Nurdin ghâḍhuwân raji sè asmaèpon Asmona Nurdin oḍi'na namong kaḍuwâ’an sareng rajina, mèlaèpon pottrana ḍâḍuwâ’ ampon alâ-bhâlâ sadhâjâ. È sèttong bâkto Nurdin katamoyan kanca ghi' SD-na. Carètaèpon akadhi ka’ḍinto:

Orentasi

Nurdin ghâḍhuwân pottra dâḍuwâ’ asmaèpon Imran sareng Tayyip. Imran sè wa'towa'an. Tayyip sè angoḍâ’ân otabâèpon alè'na. Sè kaḍuwâ ampon padâ alâ-bhâla sadhâjâ, milaèpon ta' apolong sareng rèng seppowèpon, amarghâ noro' ka compo'na rajina dhâddhi Nurdin namong wâ’ḍuwâ’ân sareng rajina èngghi ka’ḍinto Asmona. Nurdin pangorèbhânna atanè. asèlla namong kop-cokop èḍhâ’âr. Sanaos kadhi ka'ḍinto oḍi’na cè’ sampornana ta' onèng rassana aserro kakorangan. È tegghâllâ ètamennè Jhâghung, oto', sabbhrâng sareng samacemmèpon. È tabunna tegghâllâ ètamennè ka'-bhungka'an sè ngasèllaghi akadhi pao sareng nangka.

Komplikasi

È bâkto bân-abân lagghu Nurdin katamoyan kancana ghi' SD-na sè asmaèpon Ma’sum. “Assalamu’alaikum.....” Nurdin ajawâb. "Waalaikum salam”

“Bâ’na Sum, mara alongghu. Amèmpè apa ma' bhuruwânna amaèn?" Ḍhâbuwèpon Nurdin.

“Enjâ’ taḍâ’ Din. Sakèng kerrorgnga ghâllu sèngko' ka bâ’na. mangkana nyempattaghi amaèn.

“Lè', nèko’ tamoy”. Nurdin adhikanè rajina.

“Tamoy pasèra ka’?” Rajina nyaot sambi kalowar.

“Nèko’ kanca bulâ ghi' SD. empon 20 taon ta' katemmo.” Nurdin nyaot.

“Alhamdulillah.... sanaos ampon 20 taon sè apèsa. manabi Allah ngèdhinè. ghi' bisa tapongghi polè. Saporana. compo'na car-kalacèr kadhi ka’ḍinto.” Ḍhâbuna Asmona ḍâ’ tamoyya.

Serrèèpon Nurdin ngaterragghiyâ rajina ka pasar, Nurdin pas mator ḍâ’ tamoyya “Saporana bâ’na èdhina'ghiyâ sakejjhâ' polana sèngko' ngaterraghiyâ embhugghâ ka pasar. Bâ’na bân sèngko' èyangghep tarètan dhibi', rèya' nangka ḍhâ’âr, sèngko' ta' anḍi’ ka’-angka'an polè.” Nurdin makalowar nangka bungkol, laddhing, mènnya’ kalettèk, bu'bu' sareng serbèt. Saamponna panèka Nurdin sareng rajina pas mangkat.

È bâkto Nurdin mangkat, Ma’sum mèkkèr kadhibi'ân ponapa maksoddhâ Nurdin sè makalowar nangka bungkol èn-laènna. Ta' abit Ma’sum pas morak nangka gangghuy laddhing sè èsaḍiyâ’âghi. Ma’sum monḍhut saoler sarta ècangrep ḍâ’ mènnya' kalettèk èghulurrâghi ka bu'bu’, saamponna lajhu èḍhâ’âr. Ma’sum apangrasa nangka sè èḍhâ’âr ta' saè, mèlaèpon pas ambu.

Evaluasi

Sambi ngantos rabuwèpon Nurdin ḍâri pasar, Ma’sum kèr-mèkkèr kadhâddhiyân ka’ḍinto. Ta' abit saponapa Nurdin pas rabu.

Resolusi

È bâkto Nurdin ngoladhi nangkana namong Iowang saoler pas aḍhâbu; “Mara ḍhâ’âr nangkana, ma’ coma Iowang saoler? Mara ḍhâ’âr bân sèngko' ècontowana.” Serrèèpon kala ka pakso Ma’sum norodhi ḍhâbuwèpon Nurdin. Sabellunnèpon ngoler nangka, Nurdin astana nyeddhing ka mènnya' kalettèk, bhuru ngoler nangka. Saamponna cokop sè aḍhâ’âr nangka, astana pas èbhersè'è otabâ èpakessap ngangghuy bu'bu' sè ampon èsadiyâ'âghi. Sè kèng-bingkèng pas aserbèt. Sadhâjâ kalakowan ka’ḍinto ètoro'è sareng Ma’sum.

Koda

Para maos, samangkèn Ma’sum onèng ḍâ’ kasala'anna abâ'na, nangèng ta' bângal lantaran toḍus. ḍâlem atèna Ma’sum akarettek, “Apa sè èlakonè sèrgko' ghellâ sala. tapè pojhur taḍâ tao,”

Lobâr.........!

Jhâjhârbâ'ânnèpon carèta è yattas èngghi panèka

Bâgiyân-bâgiyân sè bâḍâ è carpan (unsur intrinsik cerpen) è yattas èngghi ka’ḍinto:

1. Bhâb/ parkara sè èkacarèta (tema) carpan è yattas èngghi ka’ḍinto pendidikan. Amarghâ essèna kaangghuy aparèng èlmo otabâ aparèng onèng carana aḍâ'âr nangka sopajâ ta' rekka' ghettana ka tanangnga. Nangèng ta' sadhâjâna orèng panèka onèng ka cara ka'ḍinto mèlana manabi ta' onèng kodhu atanya ka sè onèng.
   
2. Panjhâk/ tokoh sè bâḍâ neng carpan è yattas èngghi ka'ḍinto Nurdin, Asmona sareng Ma’sum. Parcoma katello bâḍâna panjhâk neng è carèta ghâpanèka nyopprè bisa fokus ḍâ' ka carètana. Manabi panjhâgghâ èpabâḍâi otabâ èpabânnya'è ḍâgghi bisa cè' lanjhângnga carètana amarghâ bânnya mas'ala sè tombu.
   
3. Jhâlânna carèta/ alur carpan è yattas aghuna'aghi alur maju amarghâ carètaèpon rontot ḍâri kadhâddhiyân sè kabidhân kantos sè pongkasan. Rontot ḍâri carètana katamoyan kantos èdhina ka pasar tamoyya tor èkherra tamoyya èbâlâi carana aḍâ'âr nangka sopajâ ta' èkennèng ghettana nangka. Sobung carèta sè nyarèta'aghi kabâ'âân sè ghi' bilânna.
   
4. Latar carpan è yattas èngghi ka'ḍinto:
   
   • Latar kennengngan carpan è yattas èngghi ka'ḍinto è kalongghuwânna Nurdin.
   • Latar bâkto carpan è yattas èngghi ka'ḍinto bân-abân lagghu.
   • Latar kabâḍâ’ân/ suasana carpan è yatas èngghi ka'ḍinto ḍâlem kabâḍâ’ân pèrak/ jhembhâr. Parkara ka'ḍinto katèngal nalèka Nurdin sareng Ma’sum ampon 20 taon sè ta' apangghi, apangghi polè.
5. Orèng/ bhârâng sè èkacarèta (sudut pandang) carpan è yattas aghuna'aghi sudut pandang orang ketiga. Marghâna sè ngangghit acarèta kabâḍâ'ânna orèng laèn ta' acarèta kabâḍâ'ânna abâ'na dhibi'.
   
6. Pamertè beccè'/ sen-pessen (amanat / pesan) carpan è yattas èngghi ka'ḍinto; Sè kapèng sèttong ngajhârrâghi bhâdhân kaulâ sareng panjhennengngan jhâ' aḍhât/ kabiyasa'an è sèttong kennengngan/ daèrah bidhâ. Manabi mèyos ḍḍ' kennengngan/ daerah laèn kodhu ngèrèng ponapa sè dhâddhi adhât/ kabiyasa'an otabâèpon sè bâḍâ è kennengngan kasebbhut salagghi' adhât/ kabiyasa'an kasebbhut ta' nyèngla ḍâri atoran/ ajhârân aghâma. Sè kapèng ḍuwâ' manabi ta’ onèng pa-ponapa/ carana ngalakonè sèttong kalakowan jhâ' ḍus-toḍus atanya nyopprè ta' sala.

Bâgiyân sè bâḍâ è lowar carèta/ unsur ekstrinsik carpan è yattas èngghi ka'ḍinto kabâḍâ’ânna sèttong adhât/ kabiyasa'an sè ta’ samè sareng kennengngan sè laèn. Bân parkara ka'ḍinto kodhu èyajhâri tor èyolma'è nyopprè ta' sala otabâ ta' dhâddhi kalèrona manabi namoy otabâ nyabis ka dhâlem otabâ kennengnga laèn.

Laèn kennengngan laèn adhât, ka'ḍinto tantona aropa'aghi kakaya'anna orèng Madhurâ hosossèpon tor orèng Indonesia Umumma. Ta' kèngèng orèng laèn ka'ḍinto nyala'aghi adhâddhâ kennengngan laènna, kodhuna orèng panèka manabi bâḍâ neng kennengngan sè adhâddhâ bhidhâ sareng kennengngan asalla wâjib ajhâr ḍhimèn ḍâ' ka orèng sè ngartè neng kennengngan è ghâ'iyâ nyopprè buḍi arè ta' dhâddhi kocemma ka abâ'na dhibi'.

Bânnya' adhât tor kabiyasa'an sanajjhân samè-samè orèng Madhurâna panèka sè ta' samè. Antarana Madhurâ polo bân Madhurâ Tapal Kuda panèka ampon bânnya' sè ta' samè. Sapanèka jhughân adhâddhâ antarana dhika sèttong sareng dhisa laènna jhughân bânnya' sè ta' samè.

Mèla ḍâri ka'ḍinto kaulâ sareng panjhennengngan kodhu jhâ' sen-bhusen sè ajhâr, jhâ' sen-bhusen sè atanya ka orèng sè langkong ngartè.