Macam Macam Istilah Anak dalam Bahasa Madura

Macam Macam Istilah Anak dalam Bahasa Madura / Cemmacemma Ca'-oca' Sambhâdhân Ana' è Bhâsa Madhurâ

Sumber Gambar : www.pxfuel.com

Samangkèng bhâdhân kaulâ bhâḍhi ngatorraghi pan-saponapan sambhâdhân otabâ istilah kaangghuy ana’.

Ḍâlem bhâsa Madhurâ cemmacemma ana’ bâḍâ sambhâdhânna sadhâjâ, èkabidhi ḍâri ana’ dhibi’ kantos ka ana’na orèng. Jhughân ta’ kadhingghâlân ana’ toronan ḍâri rèng seppo sadhâjâna bâḍâ sambhâdhânna.

Nangèng samangkèn sambhâdhân otabâ istilah akadhi panèka ampon ta’ kappra bân jhughân ampon bânnya’ orèng samangkèng otamana rèng Madhurâ dhibi’ ampon ta’ onèng ḍâ’ sambhâdhânna ana’.

Orèng kona ḍhimèn ampon aparèng pan-saponapan istilah otabâ sambhâdhân kaangghuy la-mèla otabâ ṭa-manṭa macemmèpon ana’.

Jhujhuk bisaos bhâdhân kaulâ bhâḍhi ngatorraghi ḍâ’ ka panjhennengngan nyopprè istilah otabâ sambhâdhân kaangghuy ana’ panèka ta’ èlang.

Ana' Among = Ana' Oreng laèn sè èbhâkta ḍâlem kabhutowanna

Ana' Angghâna = Ana' bânnya' tapè sè oḍi’ coma sèttong

Ana' Angkat = Ngala’ ana’

Ana' Antang antèng = Ana' lakè' sèttong ta' andi' tarètan

Ana' Bâjâng = Ana' sè ta’ dhâddhi marghâ èlang

Ana' Bhayi/Bhâji’ = Ana' sè ghi' bhuru lahèr

Ana' Bungso = Ana' lahèr sè palèng akhèr

Ana' cangghâ = Ana' toronan onḍhâgghân, sè kapèng lèma' ḍâlem bârghâ

Ana' congkè' dhulit = Ana' tello'an lakè' kabbhi

Ana' eppel-eppel = Ana' lèma' lakè' sèttong binè' empa'

Ana' GârânḍiI = Ana' bânnya' satarètanan lakè’, bungsona binè'

Ana' Ghilir Kacang = Ana' bânnya' lahèr lakè' binè'na lang-sellèng

Ana' Ghinḍhung = Ana' bânnya' kè' lakè' penengngana bâbinè'

Ana' Ghutong Majit = Ana' tello'an bâbinè' kabbhi

Ana' jâdâ = Ana' lahèr ta' ètemmo sapa eppa'na

Ana' Jâtèm = Ana' sabellunna lahèr eppa'na matè

Ana' Jhebbhing = Ana' binè'

Ana' Kabâllun = Ana' kèbâân ḍâri sè lakè' otabâ sè binè'

Ana' Kacong = Ana' lakè'

Ana' Kaḍâna kaḍini = Ana' ḍuwâ' sè towaan lakè' sè ngodhâân binè'

Ana' Kanḍung = Ana' dhibi' asli

Ana' karèpèk = Ana' katoronan onḍhâghân sè kapèng empa' ḍâlem sèttong bârghâ

Ana' katoronan = Ana' sè kapèng sèttong ḍâri bârghâ eppa'

Ana' Kembhâng sapasang = Ana' ḍâḍuwâ' binè’ kabbhi

Ana' Kembhâr = Ana' ḍâḍuwâ' sè lahèr abhâreng

Ana' Kembhâr ḍhâmpèt = Ana' kembhâr bhâdhânna adhâmpèt dhâddhi sèttong

Ana' Kiblat empa' = Ana' empa' satarètanan kalabân orodhân lakè' binè' lakè' binè'

Ana' Kompoy = Ana' katoronan onḍhâghân kapèng ḍuwâ' ḍari emba

Ana' Ko'ong = Ana' satarètanan sè la èdhina matè eppa' bân èbhuna

Ana' Ko'ong bunter = Ana' sè ta' anḍi' tarètan bân èdhina matè orèng towana

Ana' Lonca' Keddhâng = Ana' satarètanan bânnya', lahèr lakè' binè'na ta' alang-sellèng

Ana' Manto = Ana' bhâlâ lakè' / binè' Ana' dhibi'

Ana' Nanak = Ana' Ponakan

Ana' Ngala' = Ana' ollèna ngala' ana'na orèng laèn

Ana' Ogher Ogher Bâlâng = Ana' ḍuwâ' lalakè' kabbhi

Ana' Paḍângan = Ana' lalèma' satarètan lakè' kabbhi

Ana' Pancoran kapèt sènḍâng = Ana' bânnya', nè' binè' sèpanengnga

Ana' Panḍhâbâ = Ana' Ialèma' satarètan lakè' empa'

Ana' Panḍhâbâ nyanḍhângè = Ana' 6 satarètan 5 lakè' kabbhi, sè bungso 1 bâbinè'

Ana' Paṭo’ = Ana' bânnya', binè' binè' sè panengnga lalakè'

Ana' Pèyo' = Ana'na kompoy

Ana' ponakan = Ana' tarètan dhibi'

Ana' poncowati = Ana' kalèma satarètan bâbinè' kabbhi

Ana' poto = Ana' katoronan ḍâri juju'

Ana' sanḍâng kapèt pancoran = Ana' tello pancanganna binè'

Ana' sapasar = Ana' lèma' lakè' binè' campor kalabân ta' mardhuli orodhânna

Ana sarambâ = Ana' kaempa' sataretan lake' kabbhi

Ana' sarèyang = Ana' sè lahèr kabidhân

Ana' sarimpi = Ana' kaempa' satarètan binè' kabbhi

Ana somara = Ana' bânnya' satarètan tape abânnya'an lakè'na tèmbhâng binè'na

Saka’ḍinto sambhâdhân otabâ istilah kaangghuy ana’ sè bâḍâ neng bhâsa Madhurâ sè patot panèka opènè tor pèyara nyopprè oca’ panèka ta’ ghâmpang èlang mosna.

Moghâ kalabân bâḍâna tolèsan otabâ serradhân panèka sakonè’ bânnya’ kaulâ sadhâjâ samangkèn bisa onèng ḍâ’ sambhâdhânna cemmacemma oca’ kaangghuy ana’.