Jenis Artikel atau Ghâncaran

PANGAJHÂRÂN 1
Tèma : Kabhuḍhâjan
GHANCARAN
Lalampa'an 1

Indikator
3.1.1 Menjelaskan jenis artikel


Cem-macemma Ghâncaran (Jenis Artikel)

Sabellunnèpon ajhâr bhâb macemma ghâncaran nyara kaghâli areng-sareng ponapa sè èmaksod sareng ghâncaran. Mènorot (KBBI, 2001:66) ghâncaran èngghi ka'ḍinto berta otabâ kabhâr è majalah sareng salaènnèpon. Mènorot (Sumadira, 2004:1) ghânacaran èngghi ka'ḍinto tolèsan sè aèssè pamangghi sèttong orèng, sè sèpaddhâ kaḍhâng alalabânan, aparèng onèng, maparcajâ tor malèpor atè sè maos.

$ads={1}

Dhinèng macemmèpon ghâncaran èngghi ka'ḍinto:

  1. Deskripsi

    Deskripsi èngghi ka’ḍinto karangan sè aèssè ghâmbhârân sèttong parkara (suatu hal), kabâḍâ'ân kantos para maos (pembaca) kadhiyâ sè ngoladhi, mèrengngaghi otabâ arassa'aghi parkara kasebbhut. Tatengngerra/ torana; aghâmbhârrâghi sèttong bhârâng, aghâmbhârrâghi sè èlakonè rarengghânna bhâdhân, ghâḍhuwân tojjhuwân tojjhuwân sè mèreng otabâ sè maos kaangghuy ngalampa'aghi dhibi', aparèng sèttong jhâjhârbâ'ân ngèngèngè pokeddhâ berta sè aropa bârna, okoran tor salaènna.

    Conto paragraf:

    Obâ' abhâḍhi pan-sampanan kaangghuy bâḍḍhâna sasanḍhing ḍâlem lampa Rokat Tasè' (petik laut) sè èbâḍâ'âghi sareng rèng-orèng majâng sè bâḍâ è Panarokan. Pan-sampanan kasebbhut èbhâḍhi ḍâri ghâdhebbhung, lanjhângnga korang langkonng 3,5 mèter, Ièbârrâ è bâgiyân tengnga 1,5 mèter jhughân èrengghâ kalabân cè' saèna kantos akaton èndhâ ḍâ’ sadhâjâ sè ngoladhi.

  2. Narasi

    Narasi ekennal menangka carèta. Carèta sè aghânḍhu' kanyata'an (fakta) sareng fiksi. Contona sè kanyata'an: biografi, autobiografi. Contona se fiksi: novel, cerpen, Tatengngerra/ torana; aghânḍhu' berta tor kadhâddhiyân, bâktona rontot, mapaḍḍhâng ḍâ’ pasèra sè alako ḍâlem kadhâddhiyân, jhejjherrâ carèta èjhârbâ'âghi kalabân jhârna'.

    Conto paragraf:

    Radhin Ajeng Kartini èbhâbhârrâghi lerres tangghâl 21 April taon 1879 neng Koṭṭa Jhâpara Jhâbâ Tengnga. Saamponna tammat ḍâri sakola'an SD salèrana èparèngnngaghi sareng rèng seppowèpon kaangghuy nerrossaghi ḍâ’ sakola'an sè langkong tèngghi. Salèrana èpacangngaghi tor ngantos bâkto kaangghuy èpakabin. RA. Kartini cè' sossana kalabân kabâḍâ'ân sè kadhi ka’ḍinto, namong salèrana ta' bisa kaangghuy nola' parkara ka’ḍinto tako' èkoca' ana' sè dhârâka ḍâ’ rèng seppowèpon. Kaangghuy malèpor pangghâliyân sè sossa, RA. Kartini makompol ku-buku pangjhârân sareng buku pangaonèngan sè laèn kaangghuy èmaos.

  3. Eksposisi

    Karangan ka'ḍinto aèssè katerrangan sèttong topik kalabân tojjhuwân kaangghuy aparèng kabhâr otabâ pangaonèngan tambâ'ân ḍâ’ para maos (pembaca). Topik sè cocok kaangghuy èksposisi akadhi: Ghunana Lalampan Èkstrakurikulèr, Carana Abhâḍhi Ghellung Tèlèng, tor salaènnèpon. Tatengngerra/ torana; aparèng tambâna pangaonèngan, ajawâb pètanya ponapa, kadhi ponapa, bilaèpon tor aponapa.

    Conto paragraf:

    Jhâi aropa'aghi tombuwân sè bânnya' pèghunaèpon. Sala sèttongnga èngghi ka’ḍinto kaangghuy palappa sè bisa masaè ḍhâ'ârân. Jhâi bisa mabâḍâ rassa peḍḍhis ḍâ’ ḍhâ'ârân kantos rassaèpon ḍhâ’ârân langkong saè tor lemma'. Laèn ḍâri ka’ḍinto, jhâi bisa jhughân èbhâḍhi kaangghuy bhât-obhâdhân. Jhâi ka’ḍinto ampon èkaparcajâi sareng maghârsarè mènangka obhât sè bisa mabârâs tor nyegghâ panyakè' akadhi maso' angèn. Parkara ka’ḍinto amarghâ jhâi angghâḍhuwi sèttong senyawa sè aghuna kaangghuy bhâdhânna manossa.

  4. Argumentasi

    Karangan sè ghâḍhuwân tojjhuwân kaangghuy abhuktèyaghi kalerressan (kabhendherrân) sèttong pamangghi (pendapat)/ pongkasan pangghâliyân (kesimpulan)/ kanyata'an mènangka alasan/ bhuktè. Tatengngerra/ torana; maparcajâ sè maos, bâḍâ bhuktè sè aropa data, fakta, grafik, tabel tor ghâmbhâr' bâḍâ pamangghi tor parkaraèpon.

    Conto paragraf:

    Bânnya' orèng apamangghi adhât tata krama Madhurâ ampon rempèk ghumbing tor lontor ngalotor ḍâri pottra pottrè Madhura. Samangkèn ampon bânnya pottra pottrè Madhurâ sè apartèngka ta' akor sareng pa-ponapa sè ampon ècèpta sareng para seppo tor èsaroju'i sareng maghârsarè Madhurâ. Parkara ka'dinto èsabâbbhâghi ḍâri pan-saponapan parkara. Sè kapèng sèttong èsabâbbhâghi bâḍâna kabhuḍhâjhân manca sè ampon maso' ka Madhurâ. Sè kapèng ḍuwâ' korangnga pangaonèngan aghâma mongghu ngangoḍâdhân. Sè pongkasan korangnga kapardhuliyân rèng seppo pottra pottèèpon. Bânnya' reng seppo sè emo' parkara lalakon tor dhunnya kantos korang parduli kadhi ponapa tèngka lako pottrèèpon.

  5. Persuasi

    Karangan ka'ḍinto ghâḍhuwân tojjhuwân kaangghuy mèkat (ngajhâk) para maos (pembaca) kaangghuy ngalakonè sèttong kalakowan. Tatengngerra/ torana; bâḍâ ajhâghân, bâḍâ tarèka ngajhâk para maos.

    Conto paragraf:

    Pendidikan aropa'aghi parkara sè palèng parlo ḍâlem kaoḍi'ân, saè pendidikan formal otabâèpon pendidikan informal. Kalabân bâḍâna pendidikan bhâdhân kaulâ sareng panjhennengngan bisa kèngèng tor dhâddhi ponapa sè ampon dhâddhi ngen-angen. Pendidikan jhughân bisa nonton kaoḍi'ân sè langkong saè. 

    Pendidikan bisa èkèngèng kalabân ajhâr patarongghu è sakola'an otabâèpon è kennengngan laèn. Manabi bhâdhân kaula sareng panjhennengngan ta' ajhâr kalabân bhâjheng, tarongghu, tantowèpon pa-ponapa sè èlakonè ka'ḍinto parcoma amarghâ taḍâ' sè bisa èkaollè manabi ta' èlakonè kalabân ghu-ongghu atè. 

    Pangghibaddhâ bhâdhân kaulâ sareng panjhennengngan ta' bisa katekkan ponapa sè dhâddhi ngen-angen. Mèla ḍâri ka'ḍinto, nyara bhâdhân kaulâ sareng penjhennengngan nyopprèya asakola tor ajhâr kalabân anteng bhârenteng, jhuntrong tarongghu nyopprè bhâdhân kaulâ sareng panjhennengngan bisa kèngèng tor katekkan ponapa sè ampon dhâddhi ngen-angen.

Ngèrèng èyatorè maos contona ghâncaran panèka sè abhul-ombhul Abhenḍem Tamonè bân Rosèyana

2 Komentar

Komentar yang dirasa merugikan situs ini akan dihapus. Terima kasih telah berkunjung

Posting Komentar

Komentar yang dirasa merugikan situs ini akan dihapus. Terima kasih telah berkunjung

Lebih baru Lebih lama