Tèma : Bâburughân Beccè'
Drama
Lalampa 'an 3
Indikator
3.4.5 Menganalisis pesan moral teks drama
3.4.6 Menganalisis relevansi isi teks drama dengan kehidupan
Daftar Isi
Pamertè Beccè'/ Sen-pessen ḍâlem Bâca'an Drama (Amanat/ Pesan Moral)
Artèna Pamertè Beccè’
Pamertè beccè'/ sen-pessen èngghi ka’ḍinto sadhâjâ bâburughân beccè' sè parlo ètèro sareng sè maos otabâ sè ngoladhi sè bâḍâ ḍâlem drama kasèbbhut. Pamertè beccè' bisa èpangghi saamponna lastarè maos bâca'an drama otabâ nengalè drama. Pamertè beccè' bisa èpangghi ḍâri tèngka lako panjhâk, bâtek otabâ sèpattèpon panjhâk, ḍhâ-kandhâ panjhâk sareng salaènnèpon.
Mèlaèpon panjhennengan bhâḍhi ta' mangghi’i otabâ ngaonèngè pona sè dhâddhi pamertè beccè’ ḍâri sèttong carèta drama kajhâbâ’â ampon lastarè èmaos sadhâjâ. Manabi coma èmaos saparo ponapa polè namong èmaos sabhâbhâghân ta’ bhâkal mangghi’i pamertè beccè’èpon.
Pamertè beccè’ ḍâri sèttong carèta otabâ drama ka’ḍinto mènangka parkara sè sakalangkong parlona ḍâ’ ka sè maos otabâ sè nèngghu, saèngghâ sè maos bisa monḍhut èbhâḍhi tolaḍhâna kaoḍi’ânna rè-saarèna. Karana manossa panèka manabi ampon jhâu ḍâri bâbulângan otabâ bâburughân beccè’ biasaèpon abâ’na kerrèng, roh-na kosong akadhi tatamennan ta’ èsèram sakalè ta’ nyâlbhu’ ḍâun mala andhâddhiyâghi matèna.
Maos carèta sè bisa maaddhreng ḍâ’ ka parkara sè beccè’ ka’ḍinto langkong cè’ saèna amarghâ pangghâliyânna manossa panèka senneng narèma sè ghus-bhâghus sè akhèrra pèkkèrra jhughân terro nèrowana ponapa sè bâḍâ è carèta ghâpanèka, asabân sèpat asal (fitrah) manossa panèka senneng nèro.
Sapanèka jhughân manabi sè èmaos otabâ sè èyoladhi parkara sè jhubâ’, pangghâliyân panèka ta’ kèra narèma, nangèng pèkkèran sakonè’ bânnya’ bisa èpangarowè kantos bisa andhâddhiyâghi tèngkana abâ’ nèrowè pa-ponapa sè èbâca otabâ sè èyoladhi.
$ads={1}
Ḍhâ-tanḍhâ/Tatengngerra Pamertè Beccè’
- Pamertè Beccè’ ḍâlem sèttong angghidhân biyasaèpon ètotorraghi è bâgiyân pongkasanna carèta.
- Pamertè Beccè’ bisa èkaonèngè kalabân jhârna’ ḍâlem oca’ ajhâghân, bâburughân, pangrènget, sorowan, otabâ ombhângan/larangan sè bâḍâ kaèdhânna sareng tèma otama sèttong carèta.
- Pamertè Beccè’ bisa jhujhuk ètotorraghi kalabân oca’ sè samasṭèna otabâ jhughân kèngèng ètotorraghi kalabân parsemmon lèbât tèngkana panjhâk otabâ bâbâtekka panjhâk ḍâlem sèttong carèta.
- Pamertè Beccè’ sè èpaḍâpa’ sareng sè ngangghit carèta ghâḍhuwân tojjhuwân nyopprè sè maos otabâ sè nèngghu drama bisa ngalakonè akadhi amanat sè bâḍâ neng carèta kasebbhut.
Cem-macemma Pamertè Beccè'
- Pamertè Beccè’ Moḍḍhâ/terrang
- Pamertè Beccè’ Parsemmon/kèyasan
Tarèkana Nantowaghi Pamertè Beccè’ ḍâlem Carèta
Carana natowaghi pamertè peccè’ ḍâlem sèttong carèta panèka sakalangkong ghâmpang, sè parlo otabâ inti-na pamertè beccè’ panèka masṭè aessè sen-pessen bâburughân, ajhâghân, otabâ parènta kaangghuy ngalakonè parakara sè beccè’.
Kaanghuy sè sèpatta beccè’ (positif) para pangagghit carèta biyasa èpon ngangghuy oca’ ajhâghân, dhinèng kaanghhuy sè sèpatta jhubâ’ (negatif) kèngèng aessè parènta ombhângan (larangan), opamaèpon oca’ ella, ajjhâ', sènga’ bân laèn samacemma.
Pamertè Beccè’ nyebbhâr kalabân ghâmpang è bhân-sabbhân bhâbhâghân, nangèng biyasa èpon bâḍâ neng è pongkasanna carèta. Pamertè Beccè’ jughân aghuna mènangka panotoppa carèta.
Pamertè Beccè’ sè bâḍâ è drama KACA KEBBHÂNG aghânḍhu' pessen ḍâ’ para maos otabâ ḍâ’ pasèra'a bisaos saè pessen ombhângan tor jhughân pessen beccè’ kodhuna bisa èponḍhut.
Kaèdhânna Èssèna Drama sareng Kaoḍi'ân (Relevansi Teks Drama Dengan Kehidupan)
Ta’ bisa èpongkèrè carèta drama panèka kabânnya’an monḍhut ḍâri carèta kaoḍi’ân rè-saarè, biasaèpon carèta è ḍâlem drama panèka aropa pangalaman dhibi’na sè ngangghit otabâ bisa jhughân pangalamanna orèng laèn sè èbhâḍhi drama. Tèngka pola sè bâḍâ è carèta drama panèka ta’ jhâu ḍâri kaoḍi’ânna manossa.
Mèlaèpon tarkaḍhâng kabânnya’an orèng sè maos otabâ sè mèyarsa drama panèka aromasa carètana akadhi sè èyalamè abâ’na, otabâ bâḍâ jhughân sè abhung-sambhungngaghi carèta drama ghâpanèka ḍâ’ ka sèttong kadhâddhiyân sè samè carètana.
Tantona sanajjân carèta drama panèka bâḍâ sè monḍhut ḍâri carèta kadhâddhiyân sè ongghuwân nangèng manabi ampon èbhâḍhi drama ampon bânnya’ alur sè èyobâ tor ètambâi nyopprè carètana bisa lèbur tor masenneng ḍâ’ ka sè nèngghu otabâ sè maos.
Kadhâddhiyân-kadhâddhiyân sè bâḍâ è carèta drama panèka ta’ sèsèp ḍâri kaoḍi’ânna manossa rè-saarèna, mèlaèpon drama kèngèng jhughân èbhâḍhi kaca kebbhângnga oḍi’na abâ’. Pan-saponapan contona orèng, bârnana bâbâtek, ghuli ennengnga tèngka lako, tor totor oca’ sè bâḍâ è drama kèngèng jhughân ètèro èbhâḍhi tolaḍhâna oḍi’ nyopprè oḍi’ panèka bisa ngastètè manabi atèngka lako otabâ apètotor sareng orèng laèn.
Para maos, kabâḍâ'ân è dhunnya bâḍâ ḍuwâ' parkara sè alalabânan (tabhâlik). Bâḍâ sèyang bâḍâ malem, bâḍâ pènter bâḍâ bhuḍhu, bâḍâ soghi bâḍâ mèskèn, bâḍâ sossa bâḍâ pèrak, sareng samacemmèpon.
Sadhâjâ ka’ḍinto kakobâsa'an Allah sè Maha Aghung. Bhâdhân kaulâ sareng ajunan ta' kèngèng nola', nangèng kodhu narèma ḍâ’ paparèngnga Allah sè Maha Aghung sanaos paparèng ghellâ' ta' masènneng ka abâ'.
Sadhâjâ paparèng ka’ḍinto wâjib èsokkorè. Insya Allah manabi èsokkorè, Allah bhâḍhi aparèng nè'mat sè langkong saè. Sabhâligghâ manabi ta' èsokkorè, Allah bhâḍhi aparèng kasèksan (kajhubâ'ân).
Bhâdhân kaulâ sareng ajunan moghâ bisa'a nyokkorè paparèng Allah sè Maha Aghung. Ḍâlem drama KACA KEBBHÂNG ampon jhârna', sèrrèèpon Emma'na Sarinten sareng Samsul ampon nyokkorè ḍâ’ kabâḍâ'ân sè malarat (mèskèn), pongkasannèpon dhâddhi orèng sè ontong.
Posting Komentar
Komentar yang dirasa merugikan situs ini akan dihapus. Terima kasih telah berkunjung